19 кастрычніка гг. адзначаецца 30-я гадавіна мучаніцкай смерці благаслаўлёнага кс. Ежы Папялушкі. У гэты дзень у парафіяльны касцёл Унебаўзяцця Найсвяцейшай Панны Марыі і св. Язафата Кунцэвіча ў Сапоцкіне (Гродзенская дыяцэзія) будуць унесены рэліквіі крыві благаслаўлёнага.

Ксёндз Ежы Папялушка нарадзіўся 14 верасня 1947 г. на Беласточчыне ў Польшчы. Пры хросце атрымаў імя Альфонс. Рос у рэлігійнай сям’і. У 1965 годзе паступіў у Вышэйшую духоўную семінарыю у Варшаве, аднак неўзабаве быў прызваны ў войска. У войску Ежы Папялушку прыйшлося выцерпець за веру нямала здзекаў: напрыклад, аднойчы ён адмовіўся зняць з пальца ружанец, за што яму загадалі стаць босым на холадзе, і толькі калі яго ногі пасінелі ад холаду, яму дазволілі абуцца. Пакаранні і здзекі ў войску падарвалі і без таго не вельмі моцнае здароўе семінарыста. У 1972 годзе будучы благаслаўлёны прыняў прэзбітэрскае пасвячэнне з рук кардынала Стэфана Вышыньскага, Прымаса Польшчы. Перад пасвячэннем ён змяніў імя Альфонс на Ежы. На пачатку нясення душпастырскай паслугі малады святар служыў у некалькіх парафіях. Нягледзячы на сур’ёзныя праблемы са здароўем, займаўся душпастырствам медсясцёр, праводзіў сустрэчы для студэнтаў медыцыны ў касцёле св. Ганны і рэкалекцыі для сярэдняга медперсаналу, цэлебраваў Імшы для псіхічна хворых у шпіталі пры Нававейскай у Варшаве. Напрыканцы мая 1980 года ксёндз Папялушка прыбыў у варшаўскую парафію Святога Станіслава Косткі.

Летам 1980 года ў Польшчы пачаліся выступленні рабочых, падчас якіх яны пажадалі ў нядзелю ўдзельнічаць у святой Імшы.  31 жніўня кс. Папялушка цэлебраваў Імшу для рабочых «Гута Варшава». Дарэчы, з гэтымі работнікамі ён быў цесна звязаны да самай сваёй смерці.

У апошнюю нядзелю кастрычніка 1980 года пробашч парафіі Св. Станіслава Косткі ксёндз прэлат Тэафіль Багуцкі цэлебраваў першую святую Імшу за Айчыну, аднак пазней ён перадаў цэлебрацыю гэтых службаў бл. ксяндзу Папялушку. Першую Імшу за Айчыну ён узначаліў 17 студзеня 1982 года.  Гэта быў час ваеннага становішча ў Польшчы, уведзенага 13 снежня 1981 года. На Імшу прыбывала вялікая колькасць людзей з усёй Польшчы. Польскія ўлады абвінавачвалі кс. Папялушку ў палітычнай дзейнасці. «Праўда заўсёды звязана з любоўю, а любоў каштуе», «святасць не з’яўляецца прывілеем выбраных, а з’яўляецца нашым пакліканнем і абавязкам», «жыццё трэба пражыць годна, бо яно адно», «вера прыносіць найпраўдзівейшую вольнасць», — казаў святар у гаміліях.

19 кастрычніка 1984 года на зваротнай дарозе з Быдгашча, дзе ён цэлебраваў Імшу, кс. Ежы Папялушка быў скрадзены і забіты прадстаўнікамі Службы бяспекі. Толькі вечарам 30 кастрычніка было абвешчана, што ў Вісле знойдзена цела святара. Увесь гэты час людзі нястомна маліліся аб яго вяртанні.

Ксёндз Ежы Папялушка быў пахаваны каля касцёла св. Станіслава Косткі ў Варшаве. 6 чэрвеня 2010 года ў Варшаве адбылася яго беатыфікацыя

(AG)