У гэтым годзе Шанштацкі рух адзначае 100-годдзе заснавання. У многіх краінах свету, дзе дзейнічае рух, праходзяць юбілейныя ўрачыстасці. На цэнтральныя і адначасова міжнародныя ўрачыстасці, якія адбываюцца з 24 па 27 кастрычніка ў Рыме, быў запрошаны Мітрапаліт Мінска-Магілёўскі арцыбіскуп Тадэвуш Кандрусевіч, які звязаны з гэтым рухам больш за 25 гадоў.

Шанштацкі рух быў заснаваны ў 1914 г. нямецкім святаром Ёзафам Кэнтэнiхам. Галоўнай ідэяй руху з’яўляецца запавет любові з Марыяй як тройчы дзівоснай — Маці Бога, Маці Збаўцы і Маці адкупленага чалавецтва. Уступаючы ў запавет любові з Марыяй, чалавек дае абавязак жыць паводле Яе прыкладу, асабліва ў тым, што датычыць выканання Божай волі.

У багатай праграме святкавання юбілею руху была сустрэча з Папам Францішкам, якая прайшла 25 кастрычніка ў аўле Паўла VI, якую цалкам напоўнілі ўдзельнікі руху. Аўдыенцыя з Пантыфікам праводзілася на іспанскай мове і адбывалася ў форме дыялогу.

Паколькі Шанштацкі рух шмат увагі ўдзяляе сям’і, першай Пантыфіка прывітала сям’я. Выступоўцы ў сваім слове выказалі заклапочанасць станам сучаснай сям’і і пыталіся пра тое, як выйсці з гэтай сітуацыі. У адказ Папа адзначыў, што хрысціянская сям’я павінна будавацца на сакрамэнце шлюбу, падкрэсліў, што праблеме крызісу сям’і была прысвечана ІІІ Надзвычайная сесія Сінода Біскупаў, якая адбылася 5–19 кастрычніка ў Ватыкане, дадаў, што неабходна падтрымліваць сям’ю, якая дэвальвавалася. Па словах Святога Айца, сёння сакрамэнт шлюбу вельмі часта зводзіцца да абраду, без пранікнення ў яго сутнасць, таму вельмі важная падрыхтоўка да шлюбу, каб сужэнцы ведалі мэты сям’і і з Божай дапамогай іх выконвалі.

У той жа дзень беларускі Мітрапаліт узначаліў святую Імшу для ўдзельнікаў юбілейных урачыстасцяў з краін Центральнай і Усходняй Еўропы ў рымскай базыліцы Святой Марыі на Траспанціне. У гаміліі іерарх падкрэсліў, што 1914 год у чалавечай свядомасці найчасцей асацыюецца з пачаткам Першай сусветнай вайны, якая прынесла так шмат бедаў чалавецтву. «Ідэолагі вайны хацелі вайсковай сілай змяніць сусветны парадак. Мы ведаем, што з гэтага выйшла. Аднак менавіта ў той самы год а. Ёзаф Кентэніх прапанаваў свету іншы план яго змены, — дадаў арцыпастыр. — Ён сказаў, што новым часам патрэбны новы, выхаваны на прынцыпах Евангелля чалавек. Гэтым самым а. Ёзаф Кэнтэніх у пэўным сэнсе папярэдзіў Другі Ватыканскі Сабор аб неабходнасці чытаць знакі часу і своечасова на іх адказваць, бо інакш цягнік жыцця адыйдзе і ў ім застануцца людзі без касцёльнай апекі».

Мітрапаліт заахвоціў прысутных таксама чытаць знакі часу і адказваць на іх сваім хрысціянскім жыццём і сведчаннем, тым самым спрыяючы новай евангелізацыі ў часы працэсаў секулярызацыі, якія пашыраюцца. Як адзначыў арцыбіскуп, «нашы новыя, пазначаныя адыходам ад Бога часы сапраўды патрабуюць новага, поўнага дароў Святога Духа чалавека, які сам жыў бы праўдай Евангелля і яе перадаваў іншым, каб сучасным чалавекам валадарыў не бязбожны свет, але Хрыстус, які ёсць адзіным Збаўцам свету».

(DN), (AG)