Дапаможны біскуп Гродзенскай дыяцэзіі Юзаф Станеўскі ў першую нядзелю Адвэнту наведаў парафію Божай Міласэрнасці (Маладзёжны) ў Лідзе. У гаміліі падчас святой Імшы іерарх заахвоціў вернікаў да малітоўнага чування перад прыйсцем Пана.

«Адвэнт з’яўляецца пачаткам новай дарогі, часам чакання прыйсця Хрыста. Гэтае чаканне павінна быць актыўным, мы павінны вырушыць у дарогу і ісці за Хрыстом», — сказаў іерарх.

Прыгадваючы асобу св. апостала Андрэя, якога ў літургічным календары Каталіцкі Касцёл узгадваў 30 лістапада, біскуп зазначыў, што «кожны чалавек можа зачэрпнуць з багацця асобы гэтага святога»:

«Святы Андрэй, апостал, пачуўшы ў свой час пра Хрыста, пайшоў за Ім і прывёў да Яго і свайго брата Пятра. Мы таксама павінны не толькі самі ісці за Хрыстом, але і ўзяць за руку нашага брата і ісці разам у накірунку збаўлення».

«Нашым братам з’яўляецца кожны чалавек, якога сустракаем на жыццёвай дарозе», — падкрэсліў іерарх.

Біскуп адзначыў, што новы літургічны год, які распачынаецца Адвэнтам, павінен мець і «грамадскае вымярэнне»: рыхтуючыся самому, дапамагаць і іншым у гэтай падрыхтоўцы.

Біскуп Юзаф Станеўскі заахвоціў вернікаў лідскай парафіі да актыўнага перажывання Адвэнту і прыняцця пастаноў на гэты перыяд.

Кс. Юрый Марціновіч, (IL)