Пастырская сустрэча духавенства Мінска-Магілёўскай архідыяцэзіі прайшла 15 студзеня ў мінскай парафіі Св. Яна Хрысціцеля ў Серабранцы. Святую Імшу для ўдзельнікаў сустрэчы ўзначаліў Мітрапаліт Мінска-Магілёўскі арцыбіскуп Тадэвуш Кандрусевіч. 

Звяртаючыся да чытанняў гэтага дня, у гаміліі іерарх зазначыў, што цуд, здзейснены Езусам, калі хворы на невылечную праказу аздаравіўся, актуальны і ў наш час.

Як адзначыў Мітрапаліт, пракажоны не пабаяўся падысці да Хрыста з просьбай: "калі хочаш, то вылечы мяне".

«У гэтых словах хворага гучыць надзея, якую ён кладзе ў рукі Езуса. Яна выказана ў словах: калі хочаш. Хворы не кажа і не просіць: "вылечы мяне", але аддае свой лёс у рукі Езуса. Гэта была надзея супраць надзеі, бо праказа была амаль невылечная».

Іерарх падкрэсліў, што, учыніўшы цуд, Езус наказаў гэтаму чалавеку пайсці да святара, бо толькі святар меў права пацвердзіць, што пракажоны ачысціўся.

«З гэтага чытання можна зрабіць дзве асноўныя высновы. Першая — слухаць Божае слова такім чынам, каб не закрывацца перад ім і прымаць яго, каб яно перамяняла нас і ўдасканальвала. Гэта патрэбна нам, святарам і кансэкраваным асобам. Патрэбна і нашым вернікам, да якіх мы пасланыя. Касцёл усё мацней падкрэслівае неабходнасць новай евангелізацыі, як першаснага яго задання ў наш час. 

Ад гэтага будзе залежаць духоўнае становішча сучаснага свету, які вельмі часта гаворыць пра еўрапейскія каштоўнасці, у якіх, на жаль, няма месца хрысціянскім. Нездарма Папа Францішак параўнаў сучасную Еўропу са старой бясплоднай жанчынай, якая ўжо не можа нарадзіць новага жыцця.

Пасля трагедыі ў Парыжы ў рэдакцыі сатырычнага часопіса і ў магазіне кашэрных прадуктаў на мінулым тыдні адзін з каментатараў сказаў, што ўнукі пакалення 1960-х мінулага стагоддзя сёння пажынаюць плёны ліберальнай рэвалюцыі таго часу, калі студэнты ў Францыі запатрабавалі сексуальнай рэвалюцыі і абсалютнай свабоды, у тым ліку і свабоды ад Божага права.

Напэўна, нішто не можа апраўдаць забіцця супрацоўнікаў сатырычнага часопіса. Але трэба прызнаць і тое, што штодзённай практыкай гэтага часопіса былі карыкатуры не толькі Мухамеда, але і Хрыста, Касцёла, Папы і наогул хрысціянства і г.д. Ці гэта не абраза рэлігійнага пачуцця вернікаў? У той жа Францыі з нагоды святаў Божага Нараджэння адбываліся шматлікія судовыя працэсы з той нагоды, што людзі выступалі супраць батлеек перад касцёламі.

Ці гэта не пераслед хрысцінства ў імя фальшыва зразуметай свабоды і свецкасці дзяржавы? У Еўропе разам з хрысціянскай культурай знікае і культура талерантнасці. Цмок свецкасці і грамадства без Бога пажырае сваіх дзяцей, якія адракліся ад хрысціянскай культуры. Надышла пара расплаты для ўнукаў пакалення 1960-х.

Другая выснова грунтуецца на словах Езуса: ідзі і пакажыся святару. Гэта вельмі важна ў пастырскі Год навяртання. Хто можа адпусціць грахі? Толькі Бог. Але Ён дзейнічае праз святара, які ад Яго імя і імя Касцёла адпускае грахі.

Трагедыя сучаснага свету ў тым, што ён страціў пачуццё граху. Менавіта грэх з’яўляецца страшнай духоўнай праказай. Наша задача як святароў — растлумачыць вернікам, што кожны з нас грэшны і патрабуе навяртання, якое адбываецца ў сакрамэнце пакаяння», — дадаў Мітрапаліт.

Іерарх заклікаў святароў і кансэкраваных асобаў прыкласці ў новым годзе максімум высілкаў для такога абвяшчэння Божага слова, каб яно сапраўды было ўспрынята слухачамі і змяняла іх сэрцы.

Таксама арцыпастыр заклікаў святароў да правядзення пакутных набажэнстваў і ахвярнай паслугі ў канфесіянале, каб лячыць людзей ад хваробы духоўнай праказы.

(DN), (IL)