25 студзеня ў мінскім архікатэдральным касцёле Імя Найсвяцейшай Панны Марыі дапаможны біскуп Мінска-Магілёўскай архідыяцэзіі Юрый Касабуцкі ўдзяліў сакрамэнт канфірмацыі. Адметна, што ўдзяленне сакрамэнту адбывалася ў гадавіну біскупскага пасвячэння іерарха.

У сваёй гаміліі, звяртаючыся да кандыдатаў да сакрамэнту канфірмацыі, біскуп распавёў пра прыклад апосталаў, якім у дзень Пяцідзясятніцы Езус даў дар адвагі і смеласці.

«Калі мы гэтаксама адкрыем свае сэрцы на Божую любоў, то яна зменіць нашае жыццё, — адзначыў іерарх. — Калі падчас канфірмацыі мы адкрыем сэрцы з адвагай і смеласцю, як апосталы, Бог дасць нам сілы прайсці праз жыццёвыя выпрабаванні».

«Галоўнае — наша вера і любоў да Бога. Калі мы давяраем Богу, Ён не пакіне нас, як бы цяжка нам ні было», — сказаў біскуп.

Біскуп Юрый Касабуцкі таксама ўзгадаў прыклад Майсея, якому Бог даў сілы згуртаваць вакол сябе людзей. Іерарх адначыў, што ў кожнага з нас «свая індывідуальнасць», «свой шлях да вечнасці», але і «свае слабасці». І для таго, каб дайсці да вечнасці і перамагчы свае слабасці, патрэбна жаданне.

Іерарх праілюстраваў гэты прыклад эпізодам з Бібліі, дзе згадваецца горад Нініва.

«Гэта быў горад граху, як Садома і Гамора. Апошнія зніклі, бо праз грэх знішчылі самі сябе. Грэх аддаляе чалавека ад Бога. У грамадстве пачынае панаваць эгаізм і нянавісць да іншага. Калі гэтыя якасці з’яўляюцца, то цывілізацыя ператвараецца ў цывілізацыю смерці».

Як згадаў іерарх, Нініва паслухалася папярэджвання Ёны і не паўтарыла лёс Садомы і Гаморы. «Жыхары горада абвясцілі пост і пачалі перапрашаць Бога за свае ўчынкі. І Ён ім прабачыў. А ці мы з вамі жывём у даверы да Бога?» — адзначыў біскуп.

Пасля ўдзялення вернікам сакрамэнту канфірмацыі іерарх пажадаў, каб Святы Дух быў апорай і дапамогай у іх жыцці:

«Старайцеся памятаць пра Божую любоў і трывайце ў Хрысце. Бог — не тыран, а любячы Айцец, які прабачае сваім дзецям, калі яны шчыра шкадуюць за свае слабасці. Няхай Святы Дух, які пазначыў вас святымі дарамі, суправаджае вас праз усё жыццё!»

Ілья Лапато,
фота аўтара