У межах свайго візіту ў Германію біскуп Гродзенскі Аляксандр Кашкевіч па запрашэнні святароў Таварыства Хрыста для палякаў-эмігрантаў (хрыстусоўцы) 21 чэрвеня ўзначаліў святую Імшу ў касцёле Маці Божай Успамогі верных у г. Брыль каля Кёльна, падчас якой удзяліў сакрамэнт канфірмацыі групе вернікаў.

У Імшы ўдзельнічаў таксама правінцыял нямецка-галандска-італьянска-венгерскай правінцыі хрыстусоўцаў кс. Эдмунд Друз SChr, які на працягу апошніх трох гадоў выконваў функцыю дырэктара Душпастырскага цэнтра пры Канферэнцыі Каталіцкіх Біскупаў у Беларусі ў Мінску.

Біскуп Аляксандр Кашкевіч перадаў віншаванні ад вернікаў Гродзенскай дыяцэзіі, да якіх яго паслаў Пан з пастырскай паслугай. Іерарх адзначыў, што ў цяжкія часы падзей ХХ стагоддзя вернікі Беларусі далі прыгожае сведчанне сваёй веры, бо не адракліся ад Хрыста і не адышлі ад Касцёла і сёння трываюць у веры, перадаючы яе як самы каштоўны дар маладому пакаленню.

У гаміліі біскуп адзначыў, што ў душах маладых людзей, якія прыступаюць да сакрамэнту канфірмацыі, здзяйсняецца тое ж, што сталася з апосталамі ў Вячэрніку: яны сталі напоўнены Святым Духам.

Звяртаючыся да прымаючых сакрамэнт, іерарх сказаў: “Гэты Боскі Суцяшыцель умацуе вас у адважным вызнаванні веры, зробіць здольнымі мужна выступаць у яе абарону, а таксама ўмацуе ў штодзённым даванні сведчання ўласным жыццём, згодным з навучаннем Хрыста”.

“Дух Святы будзе весці вас, каб вы нястомна выходзілі насустрач свету з Добрай Навіной аб збаўленні”, - дадаў гродзенскі ардынарый.

Біскуп нагадаў маладым людзям, што сучаснаму свету неабходна сведчанне аб Хрысце – “не мноства пустых словаў без зместу, але праўдзівасць канкрэтных учынкаў”. Іерарх заахвоціў усіх быць місіянерамі ў сваім асяроддзі.

На заканчэнне Імшы моладзь падзякавала біскупу за ўмацаванне дарамі Духа Святога, а пробашч супольнасці польскай каталіцкай місіі кс. Ян Урбанэк SChr запэўніў у малітве ў інтэнцыі Каталіцкага Касцёла ў Беларусі.

Кс. Юрый Марціновіч