21 ліпеня прыпадае чацвёртая гадавіна смерці кардынала Казіміра Свёнтка. Іерарх перажыў пераслед рэлігіі, 10 гадоў лагераў, быў першым Мітрапалітам новастворанай Мінска-Магілёўскай Мітраполіі і Апостальскім адміністратарам Пінскай дыяцэзіі, першым Старшынёй Канферэнцыі Каталіцкіх Біскупаў у Беларусі.

Кардынал Казімір Свёнтэк нарадзіўся 21 кастрычніка 1914 г. у Вальку (Эстонія). Калі яму было тры гады, яго сям’ю саслалі ў Сібір.

Пасля заканчэння Вышэйшай духоўнай семінарыі ў Пінску 8 красавіка 1939 г. атрымаў прэзбітэрскае пасвячэнне і быў скіраваны на служэнне ў Пружаны. Падчас пераследу рэлігіі быў арыштаваны і асуджаны на смерць. Два месяцы знаходзіўся ў камеры смерці. Вайна, якая пачалася ў 1941 г., перашкодзіла выканаць прысуд, аднак у 1944 г. святар зноў быў арыштаваны і асуджаны на 10 гадоў лагераў, дзе цяжка працаваў спачатку ў Сібіры, а потым за Палярным кругам у Інце.

Выйшаў на волю ў 1954 г. і пачаў служыць у Пінску. Дзякуючы яго ахвярнай працы быў адбудаваны пінскі катэдральны касцёл. У той жа час ксёндз Казімір Свёнтэк рабіў усё магчымае, каб будаваць жывы Касцёл — Народ Божы.

У 1991 г. Папа Ян Павел ІІ прызначыў яго першым Мітрапалітам новастворанай Мінска-Магілёўскай Мітраполіі і Апостальскім адміністратарам Пінскай дыяцэзіі. З таго часу іерарх устанаўліваў дэканаты, ствараў касцёльныя структуры, прымаў удзел у Сінодзе Біскупаў у 1991 г., у пасяджэннях Рады Канферэнцыі Біскупаў Еўропы і іншых касцёльных арганізацыях, у міжнародных форумах. З’яўляўся сведкам пераследу каталіцкай веры і яе адраджэння ў Беларусі.

У 1994 г. Папа Ян Павел ІІ надаў яму тытул кардынала, што стала прызнаннем заслугаў не толькі таленавітага святара і біскупа, але і мужнага сведкі веры.

11 лютага 1999 г. кардынал Казімір Свёнтэк быў абраны першым Старшынёй Канферэнцыі Каталіцкіх Біскупаў у Беларусі.

27 верасня 2004 г. Папа Ян Павел ІІ уручыў кардыналу ўзнагароду «Fidei testis» (Сведка веры).

21 ліпеня 2011 г. на 97-м годзе жыцця кардынал Казімір Свёнтэк адышоў у вечнасць, перад гэтым знаходзячыся з 10 сакавіка ў пінскай бальніцы. Пахаванне адбылося 25 ліпеня 2011 г. у Пінску, святую Імшу на пляцы каля катэдральнага касцёла Унебаўзяцця Найсвяцейшай Панны Марыі ўзначаліў былы асабісты сакратар Папы Яна Паўла ІІ арцыбіскуп Кракаўскі кардынал Станіслаў Дзівіш, сябар кардынала Свёнтка.

Заахвочваем да малітвы за іерарха. Вечны адпачынак дай яму, Пане.

(AG)