На Святой Зямлі працягваецца Пленарная Асамблея Рады Біскупскіх Канферэнцый Еўропы. Форум еўрапейскіх біскупаў праходзіць з 11 па 16 верасня, у ім прымае ўдзел Мітрапаліт Мінска-Магілёўскі арцыбіскуп Тадэвуш Кандрусевіч.

14 верасня ўдзельнікі форума пакінулі Domus Galileae i накiравалiся ў Магдалу, дзе жыла св. Магдалена. У санктуарыi “Duc in altum” (“Адплывi на глыбiню”) яны цэлебравалi святую Iмшу. Святыня, якой апякуюцца айцы легiянеры Хрыста, збудавана на месцы, дзе здзейснiўся цудоўны ўлоў рыбы. Назва паходзiць ад слоў Езуса, сказаных апосталу Пятру, каб адплыў на глыбiню i там лавiў рыбу, дзе затым сапраўды ўлоў быў вялiкi, хаця перад гэтым яны лавілі ўсю ноч i нiчога не злавiлi.

Архiтэктура святынi вельмi цiкавая. У цэнтры атрыюма знаходзiцца малы фантан. Таксама ёсць калоны з iмёнамi святых жанчын Новага Запавету. На калонах у касцёле знаходзяцца выявы 12 апосталаў. Алтар зроблены ў форме чаўна, за iм праз вялiкае акно бачна Галiлейскае возера.

Iмшу ўзначалiў грэчаскі бiскуп на пенсіі Фрагрыскос Папамвнолiс, якi, нягледзячы на пенсiйны ўзрост, з’яўляецца Старшынёй Канферэнцыi Каталіцкіх Бiскупаў Грэцыi. У гамiлii іерарх нагадаў пра свайго папярэдніка на бiскупскай кафедры Крэты св. Андрэя з Крэты i яго вучэнне аб Крыжы Хрыста. Цэлебрант адзначыў, што крыж, з’яўляючыся знакам збаўлення, узвялiчвае чалавека, бо на ім здзейснiлася збаўленне, згублены чалавек быў прыцягнуты да Хрыста i стаў Божым дзiцём.

Пасля Iмшы бiскупы скіраваліся ў Ерузалем, дзе размясцiлiся ў каталiцкiм цэнтры Нотр-Дам. Адтуль яны накiравалiся ў Лацiнскi Патрыярхат, дзе Патрыярх Фуад Туаль распавёў пра складаную сiтуацыю хрысцiян i ў прыватнасці католiкаў на Блiзкiм Усходзе i папрасiў аб салiдарнасцi з iмi.

Ад Патрыярхату біскупы пайшлі працэсіяй у базылiку пустога гробу Пана. Адметным з’яўляецца тое, што калi лацінскі або праваслаўны Патрыярх накiроўваецца ў гэтую базылiку, то б’юць званы i працэсiю ўзначальваюць двое мужчын са спецыяльнымi кiямi з металу, якiмi яны б’юць у зямлю. А маючы на ўвазе, што гэта велiзарныя вышліфаваныя нагамi пiлiгрымаў камянi, разносiцца вялiкi гук. Такая традыцыя iснуе ад часоў Асманскай iмперыi. Па дарозе іерархі спаткалi беларускiх i ўкраiнскiх пiлiгрымаў, якiя цешылiся тым, што ўбачылi сваiх бiскупаў. Паразмаўляць з пілігрымамі іерархам не ўдалося, бо працэсiя павiнна была iсцi наперад.

Мітрапаліт Тадэвуш Кандрусевіч, як ён распавёў Catholic.by, сустрэў перад базылікай свайго былога мiнiстранта з Масквы, якi цяпер служыць як манах бэрнардынец у гэтым святым месцы.

Кусташ Святой Зямлi а. П’ербацiста Пiцабалла ўрачыста сустрэў і прывітаў бiскупаў. Іерархі па адным увайшлi ў пусты гроб Езуса, дзе кожны з іх памаліўся ў цiшынi. Затым у каталiцкай каплiцы ўсе іерархі памаліліся малiтвай Нешпараў, а потым прыватна памалiлiся на месцы ўкрыжавання Езуса.

Мітрапаліт Тадэвуш Кандрусевіч у гэтых святых і збаўчых для свету месцах даверыў Касцёл у Беларусi i нашу Бацькаўшчыну Уваскросламу Езусу.

Дзень завяршыўся вячэрай у Лацiнскiм Патрыярхаце, у якой прынялi ўдзел акрэдытаваныя ў Ерузалеме консулы, якiя прынялi запрашэнне іерархаў.  Патрыярх Фуад Туаль падарыў усiм удзельнiкам вячэры памятны медаль з сустрэчы Папы Францiшка з Патрыярхам Канстанцінопальскім Барталамеем, якая адбылася ў 2014 г. у 50-ю гадавiну гiстарычнай сустрэчы Папы Паўла VI з Патрыярхам Афінагорам. На адным баку медаля знаходзіцца выява базылiкi пустога гробу Пана, а на другiм – апосталаў Пятра i Андрэя ў адным чаўне.

(DN), (AG)