31 студзеня Мітрапаліт Мінска-Магілёўскі арцыбіскуп Тадэвуш Кандрусевіч цэлебраваў святую Iмшу ў парафii Божай Мацi i св. Эдварда ў г. Дрыфiлд (дыяцэзiя Мiдлсбург, Вялікабрытанія).

У гамiлii беларускi iерарх разважаў над чытаннем Евангелля на IV Звычайную нядзелю аб наведваннi Езусам сiнагогi ў Назарэце.

Арцыпастыр засяродзiў увагу прысутных на трох групах людзей, якіх прадстаўляе Евангелле. Адны, як адзначыў Мітрапаліт, «успрымалi Езуса i Яго вучэнне з энтузiязмам, бо яно было новым i адкрывала новыя перспектывы для iх». У гэтым вучэннi «была надзея на вызваленне з палону граху i духоўную свабоду». Iншыя ж «сумнявалiся i пыталiся адзiн у аднаго, цi Ён не сын Марыi i Юзафа, цi не адзiн з іх, бо з Назарэта не можа быць прарок i тым больш Месiя».

Была, адзначыў арцыбіскуп, i трэцяя група слухачоў. Пачуўшы, што Езус прыйшоў збавiць усiх людзей i што Ягонае збаўленне носiць унiверсальны характар, яны «не маглi прыняць гэтага, замыкалiся ў вузкiм габрэйскiм нацыяналiзме, мяркуючы, што Месiя збавiць толькi іўдзеяў». Таму яны, дадаў іерарх, выкiнулi Езуса з Назарэта i нават хацелi Яго забiць.

Звяртаючыся да вернікаў, Мітрапаліт Тадэвуш Кандрусевіч падкрэсліў, што «неабходна вызначыцца, да якой групы мы належым: успрымаем Езуса як Месiю i Збаўцу i жадаем жыць паводле Яго вучэння, сумняемся ў гэтым i, нарэшце, можа, выкiдваем Яго са свайго жыцця». «Ад адказу на гэтае пытанне будзе залежаць наша будучыня», - дадаў іерарх.

Арцыпастыр заклiкаў вернiкаў заўсёды заставацца вернымi хрысцiянскаму паклiканню i сведчыць яго праз сваё годнае Евангелля жыццё i ўчынкi міласэрнасцi, да чаго заклiкае Папа Францiшак у Год Мiласэрнасцi.

(DN), (AG)