У каментарыі Catholic.by Мітрапаліт Мінска-Магілёўскі арцыбіскуп Тадэвуш Кандрусевіч падзяліўся ўражаннямі ад сустрэчы беларускіх і ўкраінскіх ліквідатараў са Святым Айцом, у якой прымаў удзел і беларускі іерарх.

«Гэта сустрэча вельмі важная для ліквідатараў, — адзначыў беларускі іерарх. — Для іх важна, каб гэта не было забыта. З моманту аварыі прайшло 30 гадоў, вырасла новае пакаленне. Не ўсе сёння памятаюць пра аварыю. Але Касцёл памятае».

Паводле слоў арцыбіскупа Тадэвуша Кандрусевіча, у групе ліквідатараў, якая прымала ўдзел у сустрэчы са Святым Айцом, былі прадстаўнікі як каталіцтва, так і праваслаўя.

«Мы не рабілі падзелу па канфесіях, ды і Папу не казалі — праваслаўныя тут ці католікі; гэта былі найперш людзі», — заўважае Мітрапаліт.

Арцыбіскуп адзначыў, што Папа Рымскі згадаў ліквідатараў у сваёй прамове, а пасля падышоў да іх, каб зрабіць агульны фотаздымак.

«Папа падышоў і тым, хто быў бліжэй, паціснуў руку. А потым звярнуўся да мяне з просьбай: “Перакладзі ім, каб яны маліліся за мяне. Я патрабую вашай малітвы”. Такімі былі словы Папы», — сказаў Мітрапаліт.
Іерарх адзначыў, што ўдзельнікі сустрэчы з Пантыфікам давалі шмат каментарыяў журналістам розных рэдакцый Ватыканскага радыё.

«Людзі казалі, што ніколі не маглі падумаць, што калі-небудзь сустрэнуцца з Папам і будуць стаяць побач з ім, — адзначае іерарх. — Было бачна, што іх перажыванне вельмі глыбокае. Папа атаясамляе сабой Касцёл. Яны не хавалі сваёй радасці ад сустрэчы з Пантыфікам».

Мітрапаліт дадаў, што ліквідатары не хавалі свайго смутку па ахвярах ЧАЭС: «Калі мы маліліся за ахвяр катастрофы, па тварах ліквідатараў былі бачныя ўнутраныя перажыванні. Мне падаецца, што яны прыгадвалі падзеі 30-гадовай даўніны і, магчыма, ацэньвалі іх з іншай перспектывы».

Ілья Лапато