У рамках асамблеі 8 кастрычніка сінадальныя айцы атрымалі ў дар ад Папскай рады па справах сям’і зборнік усіх дакументаў Святога Пасаду на тэму сям’і і чалавечага жыцця.

Аб гэтым паведаміў кіраўнік Прэс-службы Апостальскай Сталіцы а. Фэдэрыко Ламбардзі, распавядаючы пра чарговыя пасяджэнні ІІІ Надзвычайнай сесіі Сіноду Біскупаў, што праходзіць у Ватыкане.

Таксама святар расказаў, што падчас пасяджэнняў звярталася ўвага на сувязь крызісу веры з крызісам сям’і. За два дні форуму выступілі каля 70 удзельнікаў. Значная ўвага звярталася на сітуацыю вакол сям’і ў Афрыцы, улічваючы вялікую колькасць прадстаўнікоў епіскапатаў з гэтага кантынента. Сваім сведчаннем падзялілася сужэнская пара з Кот-д’Івуара, у якой жонка — хрысціянка, а муж — мусульманін.

Адной з важных тэм была вера. Удзельнікі асамблеі нагадалі, што яна з’яўляецца не прывязанасцю да навучання, але асабістай лучнасцю з Хрыстом. Размова ішла пра неабходнасць даверу да Божай ласкі, пра міласэрнасць і праўду ў складаных сітуацыях, важнасць малітвы і духоўнасці ў сямейным жыцці, а таксама прабачэння і прымірэння.

Сінадальныя айцы падкрэслілі каштоўнасць пілігрымак да марыйных санктуарыяў, спалучаных з малітвай аб прымірэнні і прабачэнні ў сям’і. Былі абмеркаваны тэмы міжрэлігійнага дыялогу, дзейнасці Апостальскай Сталіцы ў міжнароднай сферы на карысць сям’і.

Паводле беларускай рэдакцыі Ватыканскага радыё

(AG)