14 студзеня 2010 г. Святы Айцец Бэнэдыкт XVI удзяліў традыцыйную аўдыенцыю для бурмістра Рыма і ўладаў рымскай правінцыі і рэгіёна Лацыя, якая адбываецца ў студзені кожнага года. Падчас сустрэчы Папа нагадаў, што кіраўнікі грамадскіх арганізацый павінны дбаць пра агульнае дабро, і заахвоціў субяседнікаў да захавання «здаровай раўнавагі», пры якой «рашэнні і планы будуць прымацца з клопатам аб усіх грамадзянах, забяспечваючы агульны дабрабыт».

Пантыфік звярнуў асаблівую ўвагу на неабходнасць «спрыяння салідарнасці, якая будзе супрацьстаяць індывідуалізму і замыканню ў сферы ўласных інтарэсаў, што перашкаджае ўсялякаму чалавечаму суіснаванню». Як адзначыў Святы Айцец, вялікую ўвагу пры гэтым варта надаць выхаванню маладога пакалення. Яно павінна базавацца перш за ўсё на дапамозе моладзі будаваць сваё жыццё на фундаменце сапраўдных рэлігійных і культурных каштоўнасцяў, што вядзе да правільнага бачання місіі чалавека ў свеце.

Бэнэдыкт XVI заклікаў грамадскія арганізацыі да супрацоўніцтва з Каталіцкім Касцёлам у рэалізацыі гэтай мэты, каб выхоўваць у маладога пакалення правільнае бачанне любові і сексуальнасці. Па словах Папы, такая любоў з’яўляецца «перажываннем у праўдзе дару з самога сябе, адкрыта на жыццё, а не замыкаецца ў нарцысавым бачанні чалавечай пары».

Напрыканцы сустрэчы Пантыфік адзначыў вялікі ўнёсак касцёльных службаў аховы здароўя ў аказанні грамадзянам медыцынскай дапамогі і заклікаў да матэрыяльнай падтрымкі гэтых арганізацый з боку мясцовых уладаў.