18 сакавіка 2010 г. Святы Айцец Бэнэдыкт XVI удзяліў аўдыенцыю членам Рымскага Саюзу прамыслоўцаў і прадпрымальнікаў. Звяртаючыся да прысутных, Папа адзначыў, што эканамічны крызіс падверг цяжкім выпрабаванням гаспадарчыя і прадукцыйныя сістэмы многіх краін. Нягледзячы на гэта, дадзеная сітуацыя можа быць шансам для таго, каб рэалізаваць новую мадэль развіцця, новую арганізацыю свету фінансаў, часам глыбокага роздуму.

Святы Айцец, узгадваючы словы са сваёй энцыклікі Caritas in veritate («Любоў у праўдзе»), заклікаў да таго, каб у цэнтры эканомікі і свету фінансаў знаходзілася чалавечая асоба, і прапанаваў такую прававую і палітычную сістэму, якая б дазваляла больш паспяхова рэалізоўваць дасягненне агульнага дабрабыту чалавечай сям’і. Перад абліччам росту беспрацоўя і збяднення многіх людзей працы Папа падкрэсліў неабходнасць магчымасці доступу для кожнага чалавека да годнай працы.

Акрамя гэтага, Пантыфік звярнуў увагу на важнасць прысутнасці ў прадпрымальніцкай дзейнасці духу асабістай ахвярнасці, пераадолення індывідуалістычнай і матэрыялістычнай ментальнасці. Папа заклікаў прадпрымальнікаў і прамыслоўцаў супрацоўнічаць з іншымі грамадскімі сферамі, падтрымліваць навуку, пазбягаць несумленнай канкурэнцыі, памятаць аб сваіх грамадскіх абавязках і ствараць прадукцыю высокай якасці, якая б адпавядала сапраўдным патрэбам людзей.

Святы Айцец заахвоціў прысутных весці сваю дзейнасць у кантэксце супольнасці, «у духу служэння, у перспектыве прыналежнасці да Божай сям’і, гуманізму, які ажыўлены любоўю і кіруецца праўдай, гуманізму, адкрытага на Бога, а таму і на чалавека, а таксама на жыццё, якое разумеецца як агульная і радасная задача».