21 верасня Святы Айцец Бэнэдыкт XVI удзяліў аўдыенцыю біскупам Францыі, якія прыбылі ў Рым з візітам аd limina Apostolorum. Звяртаючыся да іерархаў, Папа адзначыў іх энергічную працу на карысць новай евангелізацыі ў краіне і на місіі.

Пантыфік падкрэсліў, што моцныя хрысціянскія карані Францыі — гэта фундамент, які дае магчымасць мужна і аптымістычна вырашаць праблемы і творча знаходзіць новыя падыходы для абвяшчэння Евангелля ў секулярызаванам грамадстве. Папа прыпомніў сваю нядаўнюю сустрэчу ў Люрдзе, дзе прывітаў многія французскія ініцыятывы, напрыклад, працяг у краіне Года святарства для лепшага выяўлення пакліканняў.

Як паведамляе Ватыканскае радыё, Святы Айцец высока ацаніў уклад Касцёла ў сацыяльнае жыццё Францыі, дапамогу бацькам, ініцыятыву «новай нядзелі», якая аднаўляе святасць агульнай малітвы ў сціслай парафіяльнай супольнасці вернікаў. Таксама Папа перасцярог адносна прапановы французскіх біскупаў па стварэнні новых структур свецкіх вернікаў.

«Існуе рызыка(...) бюракратызацыі пастырства, калі засяроджанне на структурах, арганізацыях і праграмах можа прывесці да замкнёнасці і выкарыстоўвання гэтых структур самімі іх членамі. Евангелізацыя патрабуе пачынаць ад сустрэчы з Панам, у дыялогу, укаранёным у малітве, і, больш за тое, канцэнтрацыі на сведчанні і на дапамозе сучасніку, каб ён мог сустрэць і нанава адкрыць знакі прысутнасці Бога», — сказаў Пантыфік.

Папа пахваліў іерархаў за тое, што па ўсёй Францыі аддаецца вялікая ўвага адарацыі Святых Сакрамэнтаў. Гаворачы пра 600-годдзе Жанны д’Арк, якое шырока адзначаецца ў краіне, Святы Айцец заўважыў, што найбольш арыгінальны аспект яе дзейнасці быў у спалучэнні містычнага вопыту з палітычнай місіяй.

Бэнэдыкт ХVI падкрэсліў важнасць працы на карысць сям’і і шлюбу, а таксама па пашырэнні ініцыятыў сярод моладзі. У канцы сустрэчы Святы Айцец заклікаў французскіх біскупаў да натхнёнай евангелізатарскай працы, каб усё чалавецтва станавілася ў Хрысце адзінай сям’ёй, братэрскай і салідарнай.

(AG)