8 кастрычніка ў першай палове дня Святы Айцец Бэнэдыкт ХVI прыняў удзел у працы Сіноду Біскупаў па новай евангелізацыі, які праходзіць у Ватыкане. У разважанні Папа звярнуў увагу, што евангелізацыя пачынаецца з усведамлення таго, што Бог дзейнічае ў Касцёле, а Касцёл абвяшчае Хрыста свету.

«Хто Ён — Бог, і што Ён мае супольнага з чалавецтвам? — запытаўся Пантыфік. — Бог — гэта адна з гіпотэз ці рэальнасць?» Бэнэдыкт ХVI нагадаў, што Бог заўсёды размаўляў са сваім народам і неаднаразова парушаў «вялікае маўчанне». Менавіта гэтую рэальнасць трэба даносіць да сучаснага чалавека. Святы Айцец падкрэсліў, што, каб асягнуць гэта, неабходна перш за ўсё маліцца.

Апосталы, па словах Святога Айца, не заснавалі Касцёла на нейкай канстытуцыі, але збіраліся на малітву ў чаканні Пяцідзясятніцы. «Калі Бог не дзейнічае, нашы справы застаюцца толькі нашымі, а гэтага недастаткова», — сказаў Папа.

Як інфармуе Ватыканскае радыё, Святы Айцец выказаў упэўненасць, што «Сімвал веры» сучаснага католіка змяшчае ў сабе мартыралагічны элемент, элемент сведчання перад варожымі ўстановамі сваёй веры, сведчання сваімі цярпеннямі нават у небяспецы смерці. «Сімвал веры» ў сучаснай сітуацыі цесна звязаны з міласэрнасцю.

«Хрысціянская вера павінна станавіцца ў нас паходняй любові, паходняй, якая па-сапраўднаму асвячае наша існаванне», — у гэтым, паводле Бэнэдыкта ХVI, сутнасць новай евангелізацыі.

(AG)