Старшыня Папскай рады па культуры кардынал Джанфранка Равазі вельмі задаволены тым, як прайшоў 16–17 лістапада «Падворак язычнікаў» у партугальскіх гарадах Гімарайншы і Бразе. Як адзначыў іерарх, мерапрыемства ахапіла «амаль увесь гарызонт культуры, чалавецтва, грамадства, сучаснай духоўнасці».

Па словах кардынала, падчас дыскусіі на тэму «Каштоўнасць жыцця» ўдалося пераадолець розніцу, якая часта ўзнікае паміж веруючымі і няверуючымі вакол пытання таямніцы і боскасці. «Усе мы з’яўляемся жывымі істотамі з той жа самай свядомасцю, свабодай, магчымасцю задаваць пытанні», — падкрэсліў старшыня Папскай рады.

Перад ад’ездам з Партугаліі іерарх заклікаў мясцовых католікаў «мець вочы, адкрытыя на свет», быць салідарнымі і падтрымліваць справядлівасць — нават калі гэта патрабуе «моцных словаў».

«Падворак язычнікаў» у Партугаліі пачаўся 16 лістапада агучваннем паслання Святога Айца Бэнэдыкта XVI, у якім Папа заахвоціў веруючых і няверуючых памятаць пра святасць жыцця. «Нават сярод цяжкасцяў і няпэўнасці кожны можа дайсці да пазнання святасці чалавечага жыцця ў натуральным законе, упісаным у сэрца», — адзначыў у пасланні Пантыфік.

Галоўным пунктам першага дня сустрэчы была тэма каштоўнасці і сэнсу жыцця кожнага чалавека. У дэбатах прыняў удзел кардынал Равазі. На наступны дзень адбылася дыскусія аб стылі жыцця і абароне сусвету, а таксама прайшлі канцэрты, выставы і тэатральныя пастаноўкі.

(AG)