«Дыялог Касцёла з мастацтвам — важны інструмент, які пацвярджае хрысціянскую спадчыну Еўропы», — падкрэсліў старшыня Папскай рады па культуры кардынал Джанфранка Равазі. 15 лістапада іерарх прыняў удзел у канферэнцыі «Літургія, мастацтва і архітэктура праз 50 гадоў пасля Другога Ватыканскага Сабору», арганізаванай Каталіцкім універсітэтам Партугаліі ў Лісабоне.

Як адзначыў кардынал Равазі, Апостальская Сталіца не баіцца сучаснага мастацтва. Па словах іерарха, «мастацтва і вера з’яўляюцца сёстрамі, якія зноў павінны прамаўляць адзіным голасам, бо абедзве яны прадстаўляюць нябачнае, якое становіцца бачным». Старшыня ватыканскага ведамства дадаў, што паміж імі неабходна паляпшэнне адносінаў, параненых адсутнасцю ў сучасным мастацтве хрысціянскай сімвалічнай мовы.

Кардынал заўважыў таксама недахопы ў сучаснай сакральнай архітэктуры, якая ў апошнія гады нярэдка мае мала супольнага з духоўнасцю. Прыкладам гэтага з’яўляюцца «касцёлы, якія не запрашаюць да трансцэндэнтнага».

(AG)