6 лютага ў замку Анёла ў Рыме адкрыецца выстава «Шлях св. Пятра». На выставе, прымеркаванай да Года веры, будуць прадстаўлены 40 выяваў апостала, найстарэйшая з якіх паходзіць з IV стагоддзя, у тым ліку іконы, якія належаць да традыцыі Усходніх Касцёлаў.

Выставу арганізавала Папская рада па новай евангелізацыі. Як адзначыў яе старшыня арцыбіскуп Рына Фізікела, такім чынам Касцёл жадае дасягнуць сэрца сучаснага чалавека, які адчувае прагненне Бога і незадаволенасць тымі ўзорамі шчасця, якія яму прапануе свет.

«Чалавечае сэрца хоча пазнаваць і здзіўляцца, — сказаў арцыбіскуп, словы якога прыводзіць Ватыканскаe радыё. — Мы жадаем паказаць яму прыгажосць, якая стварыла культуру і захоўваецца на працягу стагоддзяў, абуджаючы роздум і здзіўленне. З такой думкай мы арганізавалі гэтую выставу: каб падтрымаць гэтае прагненне і сум па Богу, часта нявыказаны. Падарожнічаючы праз стагоддзі, мы хочам паказаць постаць апостала Пятра, які заўсёды быў выклікам для мастакоў, што імкнуліся заглыбіцца ў таямніцу яго веры і выявіць яе».

(AG)