Евангелізацыя павінна ўвайсці ў жыццё кожнага хрысціяніна, каб ён быў катэхетам, спалучаючы веру са штодзённасцю, — так старшыня Папскай рады па новай евангелізацыі арцыбіскуп Рына Фізікела пракаментаваў змены, уведзеныя Святым Айцом у кампетэнцыі ватыканскіх ведамстваў. 25 студзеня Пантыфік перадаў Папскай радзе адказнасць за катэхетычную дзейнасць ад Кангрэгацыі па справах Духавенства.

У газеце Апостальскай Сталіцы «L‘Osservatore Romano» арцыбіскуп Рына Фізікела піша, што менавіта катэхізацыя з’яўляецца новым інструментам для паспяховай місіі Касцёла несці Добрую Навіну кожнаму. Іерарх падкрэслівае, што быць вернікам не азначае жыць казкамі ці міфамі мінулага, але імкнуцца асабіста ўносіць уклад у праўду аб’яўлення, якое знаходзіць сваю паўнату ў Езусе Хрысце. Усведамленне гэтага і можа прывесці да мэты новай евангелізацыі — даць магчымасць усім вернікам сустрэцца з Езусам.

Старшыня Папскай рады дадае, што новая евангелізацыя адбываецца ў абставінах сучаснага свету, які перажывае незнаёмыя дагэтуль працэсы, калі адрасат аб’яўлення ўсё больш пагружаецца ў тэхналагізаваную культуру.

«Быць адукаваным у веры — права кожнага верніка, якое ён павінен адкрыць нанава для будавання ўласнай ідэнтычнасці і рушыць да ўсё большага паглыблення таямніцы, у якую верыць», — адзначыў арцыбіскуп, словы якога прыводзіць Ватыканскае радыё. Іерарх з аптымізмам падкрэслівае, што рэлігійная неадукаванасць можа быць з поспехам пераадолена.

(AG)