Колькасць патэнцыяльных удзельнікаў Канклава паменшыцца яшчэ на аднаго кардынала

10.02.2011 17:24

Іспанскі кардынал Агустын Гарсія Гаско-Вісэнтэ, былы арцыбіскуп Валенсіі, 12 лютага 2011 г. адзначыць сваё 80-годдзе. Гэта азначае, што колькасць кардыналаў, якія могуць удзельнічаць у выбары новага Папы, скараціцца да 118 чалавек, у той час як агульная колькасць кардыналаў у Калегіі — 201. Калегію Кардыналаў — дарадчы орган для абмеркавання найбольш важных касцёльных справаў, а таксама для выбару Папы — утвараюць кардыналы разам з Папам. На Кансісторыі 5 лістапада 1973 г. папа Павел VI зацвердзіў максімальную колькасць кардыналаў, якія маюць права прымаць удзел у галасаванні пры абранні Рымскага Пантыфіка. Гэтая колькасць не павінна перавышаць 120 асобаў. Калегія Кардыналаў таксама здзяйсняе вярхоўную ўладу ў Касцёле з моманту смерці Пантыфіка да абрання новага.