Чуе нас, аб чым бы мы ні папрасілі

Чытанне Першага паслання святога апостала Яна.

Умілаваныя:

Давер, які мы маем да Сына Божага, ёсць у тым, што, калі мы просім аб нечым згодна з воляй Ягонай, Ён чуе нас. А калі ведаем, што Ён чуе нас, аб чым бы мы ні папрасілі, дык ведаем, што мы ўжо атрымалі ад Яго тое, аб чым прасілі.

Калі хто ўбачыць, што брат яго грашыць грахом, які не вядзе да смерці, няхай моліцца, і Бог дасць яму жыццё; тым, хто грашыць грахом, які не вядзе да смерці. Ёсць грэх, які вядзе да смерці, але не аб гэтым кажу, каб ты маліўся. Усялякая несправядлівасць — гэта грэх, і ёсць грэх, які не вядзе да смерці.

Мы ведаем, што кожны, хто нарадзіўся ад Бога, не грашыць, але Народжаны ад Бога захоўвае яго, і злы яго не кранае. Ведаем, што мы ад Бога і што ўвесь свет знаходзіцца ў злым. Ведаем таксама, што Сын Божы прыйшоў і даў нам разуменне, каб мы пазналі Праўдзівага. І мы — у Праўдзівым, у Сыне Яго Езусе Хрысце. Ён — праўдзівы Бог і Жыццё вечнае.

Дзеці, беражыце сябе ад ідалаў.

Гэта слова Божае.

аРЭСПАНСАРЫЙНЫ ПСАЛЬМ

Рэфрэн: Спявайце Пану, бо народ свой любіць.
Або: Аллелюя

1. Спявайце Пану новую песню, *
хвала Яму на сходзе святых.
2. Няхай радуецца Ізраэль таму, хто яго стварыў, *
сыны Сіёну няхай цешацца ў сваім Валадары.

Рэфрэн:

3. Няхай праслаўляюць імя Ягонае ў танцы, *
няхай зайграюць Яму на бубне і арфе.
4. Бо Пан любіць свой народ, *
пакорных карануе збаўленнем.

Рэфрэн:

5. Няхай усклікаюць святыя ў славе, *
няхай радуюцца на ложах сваіх.
6. Пахвалы Богу на іх вуснах. *
9. Гэтая хвала для ўсіх Ягоных святых.

Рэфрэна СПЕЎ ПЕРАД ЕВАНГЕЛЛЕМ

Сябар жаніха радуецца голасу жаніха

+ Чытанне святога Евангелля паводле Яна.

У той час:

Езус прыйшоў з вучнямі сваімі ў край Юдэйскі і там заставаўся з імі, і хрысціў. А Ян таксама хрысціў у Айноне, каля Салема, бо там было шмат вады. І прыходзілі людзі, і хрысціліся; бо Яна яшчэ не кінулі ў вязніцу.

І ўзнікла спрэчка ў вучняў Яна з юдэямі пра ачышчэнне. І прыйшлі да Яна і сказалі яму: Раббі, той, які быў з табою за Ярданам і пра якога ты сведчыў, вось Ён хрысціць і ўсе ідуць да Яго.

Ян сказаў у адказ: Не можа чалавек нічога ўзяць, калі яму не будзе дадзена з неба. Вы самі мне сведкі ў тым, што я сказаў: Я не Хрыстус, але я пасланы перад Ім. Хто мае нявесту, той жаніх; а сябар жаніха, што стаіць і слухае яго, вельмі радуецца голасу жаніха. Вось гэтая радасць мая споўнілася. Яму трэба ўзрастаць, а мне станавіцца меншым.

Гэта слова Пана.

Пераклад здзейснены Секцыяй па перакладзе літургічных тэкстаў і афіцыйных дакументаў Касцёла пры ККББ