Дэлегацыя з Беларусі, якая прымала ўдзел у VIII Сусветнай сустрэчы сем’яў у Філадэльфіі (ЗША), пабывала на сустрэчы з Папам Францішкам. У складзе беларускай дэлегацыі былі біскуп Пінскі і старшыня Рады па справах сям’і беларускага епіскапату Антоні Дзям’янка, сакратар Рады па справах сям’і а. Пётр Фраштэнга OCD, сямейная пара Андрэй Мілееў і Наталля Пан.

26 верасня ўвечары на фестывалі сем’яў на праспекце Бенджаміна Франкліна Святога Айца з вялікім энтузіязмам віталі шматлікія сем'і з усяго свету. Падчас фестывалю малітва чаргавалася са спевамі, танцамі і сведчаннямі.

Аб сваіх цяжкасцях і радасцях распавялі на фестывалі сужэнцы, самотныя маці, бабулі і дзядулі. Сям’я з Іарданіі расказала аб пераследзе, якому падвяргаюцца хрысціяне на Блізкім Усходзе. Нарачоныя з Аўстраліі далі сведчанне свайго выспявання да любові і барацьбы за дашлюбную чыстасць.

Папа Францішак, звяртаючыся да прысутных, адзначыў, што сям’я сустракаецца са шматлікімі цяжкасцямі, але іх можна пераадолець любоўю. Па словах Пантыфіка, варта змагацца за сям’ю, бо яна з’яўляецца асновай здаровага грамадства. «Дзякуй усім, хто даў сваё сведчанне. Ваша прысутнасць — гэта таксама дасканалае сведчанне. Гэта сапраўднае сведчанне, што варта жыць у сям’і», — сказаў Святы Айцец.

Пантыфік дадаў, што ўсю прыгажосць, любоў і праўду, якую Бог мае ў сабе, Ён перадаў сям’і, і яна толькі тады з’яўляецца сапраўды сям’ёй, калі здолее прыняць гэты дар. Святы Айцец прызнаў, што ў сям’і здараюцца цяжкасці і цярпенне, але пасля іх заўсёды прыходзіць уваскрасенне. Акрамя таго, Папа заахвоціў да асаблівага клопату аб дзецях, моладзі і пажылых людзях.

Таксама Святы Айцец сустрэўся з біскупамі, якія прыбылі на Сусветную сустрэчу сем’яў. Звяртаючыся да іх, Пантыфік падкрэсліў, што сучасная культура заахвочвае да таго, каб не звязвацца ні з чым і ні з кім, не абуджаць даверу і не давяраць. Гэта, па словах Папы, вядзе да радыкальнай самотнасці, якая ўцякае ў віртуальны свет. Пантыфік папрасіў біскупаў суправаджаць сем’і і лячыць іх раны. «Мы, біскупы, як пастыры пакліканы да таго, каб сабраць нашы сілы і адбудоўваць энтузіязм, каб рабіць сем’і ўсё больш згоднымі з благаслаўленнем Бога, згоднымі з іх пакліканнем! — сказаў Святы Айцец. — Мы павінны выкарыстоўваць нашы сілы не толькі ў тым, каб казаць пра праблемы атачаючага нас свету і пра заслугі хрысціянства, але і ў тым, каб скіроўваць да маладых людзей шчырае заахвочванне, каб яны былі адважнымі і рашаліся на сужэнства і сям’ю».

Нядзельная святая Імша ў межах VIII Сусветнай сустрэчы сем’яў у Філадэльфіі была апошнім афіцыйным пунктам візіту Папы ў ЗША. У гаміліі Святы Айцец перасцярог перад стварэннем падзелаў і «замкнёных колаў» у Касцёле. Пантыфік дадаў, што свабода Бога перавышае «бюракратыю і замкнёныя колы». Гэтыя з’явы, па словах Папы, пагражаюць аўтэнтычнасці веры, таму неабходна «рашуча іх адкінуць».

Бог хоча, каб усе Яго дзеці бралі ўдзел у свеце Евангелля, адзначыў Пантыфік і нагадаў, што Езус кажа: «Не перашкаджайце таму, што добра — наадварот, дазваляйце яму расці».

Падчас Імшы Папа казаў таксама аб «прарочым» вымярэнні «запавету паміж мужчынам і жанчынай, які прыносіць жыццё і паказвае Бога». «Кожны чалавек, які жадае заснаваць сям’ю, што будзе вучыць дзяцей радасці ад кожнага дзеяння, імкнуцца да таго, каб перамагаць зло, сустракаецца з нашай удзячнасцю і прызнаннем, без увагі на тое, да якога народа, рэгіёну і рэлігіі ён належыць», — сказаў у гаміліі Святы Айцец.

(AG)