11 жніўня ўспамін сваёй апякункі, св. Клары, адзначаюць працаўнікі тэлебачання. Сёлета спаўняецца таксама 800 гадоў Ордэну Убогіх Сясцёр, заснаванаму святой.

Святая Клара нарадзілася ў Асізі ў 1194 г. (таму часта яе называюць Асізскай). У 18 гадоў вырашыла пакінуць бацькоўскі дом і прыняла з рук св. Францішка (які быў яе сябрам) манаскае адзенне. Разам са сваёй сястрой Агнешкай жыла пры касцёле святога Дам’яна непадалёк ад Асізі, побач з якім праз нейкі час утварыўся невялікі кляштар. Ён стаў першай сядзібаю Ордэна Убогіх Сясцёр (кларысак), статут якога напісаў сам святы Францішак. Памерла ў 1253 г. Праз яе заступніцтва просяць дапамогі пры хваробах вачэй і слепаце.

Апякункай тэлебачання і радыё святую абвясціў папа Пій XII у 1956 г. Лічыцца, што незадоўна да смерці святая Клара, будучы прыкутай да ложка і не маючы магчымасці ўдзельнічаць у Імшах, мела здані: на сцяне свайго пакоя выразна бачыла літургію, нібы там быў тэлевізар.

Сёння асаблівае месца сярод каталіцкага тэлебачання займае Ватыканскі тэлецэнтр, заснаваны папам Янам Паўлам ІІ у 1983 г. Характарызуецца ён высокім прафесіяналізмам працаўнікоў і пастаянным укараненнем новых тэхналогій.

У Беларусі не існуе каталіцкага тэлебачання, аднак на дзяржаўных каналах ствараюцца перадачы пра жыццё католікаў. Сёння асноўнымі з іх з’яўляюцца «Вытокі» (Тэлерадыёкампанія «Віцебск»), «Сімвал веры» (Тэлерадыёкампанія «Гродна» і відэастудыя Гродзенскай дыяцэзіі) і «Размовы са святаром» (тэлеканал «Беларусь-2»).