19 красавіка матацыклісты з усёй Польшчы і з-за мяжы ў рамках ХІІ Злёту матацыклістаў імя кс. Улана Здзіслава Пяшкоўскага маліліся на Яснай Гары аб бяспечнай яздзе і патрэбных ласках перад распачаццем сезону. Было асвечана больш за 30 тысяч матацыклаў.

 Як кажуць самі матацыклісты, па традыцыі перад пачаткам сезону яны здзяйсняюць пілігрымку да Маці Божай Чэнстахоўскай, прыбываючы туды з інтэнцыямі, каб прасіць аб Божым благаслаўленні, маліцца за ўсіх, хто падарожнічае па зямных шляхах, і ўзгадаць у малітве тых, хто ўжо падарожнічае па шляхах вечнасці. Усіх удзельнікаў злучае любоў да матацыклаў і вера ў Бога, без якога яны не бачаць магчымасці свайго існавання і сэнсу жыцця.

Цэнтральным пунктам сустрэчы стала святая Імша на палявым алтары, якую ўзначаліў Мітрапаліт Мінска-Магілёўскі арцыбіскуп Тадэвуш Кандрусевіч. Беларускі іерарх быў запрошаны на гэтыя ўрачыстасці невыпадкова: як ён сам адзначыў, ён ужо не ўпершыню сустракаецца з некаторымі іх удзельнікамі. Раней гэта мела месца ў Маскве падчас служэння арцыбіскупа ў Расіі, таксама ў Беларусі – у Будславе. Іерарх меў магчымасць сустракацца з імі і ў Шчэціньскай дыяцэзіі (Польшча).

У гаміліі Мітрапаліт падкрэсліў значэнне ў жыцці хрысціяніна святой Імшы, якая развівае і ўмацоўвае ў чалавеку веру. “Калі мы не можам распазнаць Хрыста ў нашым жыцці, то паспяшаемся на Эўхарыстыю, і Ён нам аб’явіцца, – адзначыў арцыпастыр. – Гісторыя хрысціянства ведае шмат прыкладаў, калі нават няверуючыя дзякуючы Эўхарыстыі кардынальна змянялі сваё жыццё і станавіліся глыбока веруючымі”. “Эўхарыстыя вядзе да ўмацавання нашай веры”, – дадаў іерарх.

Арцыпастыр высока ацаніў тое, што новы сезон матацыклісты — удзельнікі гэтых урачыстасцяў — распачынаюць менавіта Эўхарыстыяй, “каб з умацаванай верай вырушыць на новыя дарогі”.

Іерарх узгадаў таксама пра патрэбу новай евангелізацыі, або адкрыцця нанова паслання Евангелля, якое вядзе чалавека да асабістай сустрэчы з Хрыстом. Мітрапаліт заахвоціў матацыклістаў даваць сведчанне праз сваю любоў да матацыклаў.

“Касцёл шукае новых шляхоў перадачы Добрай Навіны людзям згодна з патрабаваннямі часу. Трэба шырэй выкарыстоўваць традыцыйныя і новыя метады евангелізацыі; медыя, якія сталі новым арэапагам сучаснага свету; навуку, культуру і мастацтва; пілігрымкі, – адзначыў арцыбіскуп. – Сярод гэтых шляхоў важнае месца належыць вам, матацыклісты. Людзі здзіўляюцца вашаму ўменню кіраваць матацыклам, імкненню да пераадолення розных цяжкасцяў, і гэта праўда”.

Арцыпастыр назваў малітву матацыклістаў у яснагорскім санктуарыі сведчаннем, якое патрэбна сучаснаму свету, асабліва моладзі, якая шукае свайго шляху да Бога.

На заканчэнне гаміліі іерарх даручыў матацыклістаў і ўсіх падарожнікаў Маці Божай Чэнстахоўскай, якая, па словах Мітрапаліта, добра ведае цяжар пілігрымавання.

Поўны тэкст гаміліі>>>

Пасля Імшы Мітрапаліт быў перавезены праз плошчу на матацыкле і асвяціў усе матацыклы.

Як і штогод, матацыклісты прывезлі з сабой мяккія цацкі для дзяцей-сірот.

Кс. Юрый Марціновіч