24 красавіка Мітрапаліт Мінска-Магілёўскі арцыбіскуп Тадэвуш Кандрусевіч прыняў удзел у святкаванні 25-годдзя адраджэння структур Каталiцкага Касцёла ў Калiнiнградскай вобласці (Расія). Сённяшні Мітрапаліт Мінска-Магілёўскі быў першым біскупам на гэтых землях пасля доўгага перыяду ганенняў.

Святая Імша адбылася ў касцёле св. Адальберта ў Калінінградзе. На ўрачыстасцях сабралася вельмі вялікая колькасць вернікаў, у тым ліку вялікія дэлегацыі з Польшчы і Германіі (дыяцэзія Фульда).

Звяртаючыся да прысутных, Мітрапаліт Тадэвуш Кандрусевіч сказаў у гаміліі: «Яшчэ не так даўно здавалася, што на гэтай зямлі больш ніколі не будзе абвяшчацца Евангелле. Аднак немагчымае чалавеку аказалася магчымым Богу».

«Сёння мы дзякуем Богу за мучаніка гэтай зямлі св. Войцеха-Адальберта, які першым прынёс сюды Добрую Вестку. Мы ўдзячныя многім вядомым і невядомым мучанікам гэтай зямлі, якія акрапілі яе сваёй крывёю на працягу ўсёй яе славутай і трагічнай гісторыі», — дадаў арцыпастыр.

Іерарх нагадаў таксама пра мучанікаў атэістычнага рэжыму, пра «мужных сведкаў веры, нашых бацькаў і маці, дзядуляў і бабуль, якія (…) у катакомбных умовах вучылі нас веры».

Мітрапаліт узгадаў пра тое, як, будучы Апостальскім адміністратарам Мінскай дыяцэзіі для католікаў лацінскага абраду ў Беларусі, ён быў пераведзены ў Маскву з юрысдыкцыяй на Еўрапейскую частку Расіі, каб такім чынам быць пастырам і для католікаў Калінінградскай вобласці.

«Да гэтага я ніколі не быў у Калінінградзе, але наслухаўся пра яго шмат, — сказаў іерарх. — Перш за ўсё пра тое, што тут пасля Другой сусветнай вайны не засталося ніводнай каталіцкай святыні і ніводнага святара. Працуючы ў Вільнюсе, я неаднаразова сустракаўся з калінінградскімі католікамі, якія чакалі і не маглі дачакацца, калі ў іх будуць святары і храмы».

«Чуў я і аб тым, што тут разбураліся помнікі архітэктуры, у тым ліку і сакральныя. Чуў, што быў разбураны знакаміты Кёнігсбергскі замак. Усё гэта казала пра тое, што гэтая зямля стала палігонам атэізму, які паставіў сабе задачу агнём бязвер’я выпаліць веру і ператварыць яе ў духоўную пустыню», — адзначыў Мітрапаліт.

Арцыпастыр нагадаў пра святароў — «Адальбертаў нашага часу», якія, калі там не было храмаў, служылі Імшы на вуліцах і плошчах. «Сёння, як першы біскуп на гэтай зямлі пасля доўгага перыяду ганенняў, хачу ад усяго сэрца ім падзякаваць. З  Божай дапамогай яны ўзяліся за, здавалася б, немагчымае — з руін адрадзіць Касцёл», — дадаў Мітрапаліт.

Арцыбіскуп адзначыў, што сёння, пасля 25 гадоў, Каталіцкі Касцёл у Калінінградскай вобласці ганарыцца сваімі развітымі структурамі, «адыгрывае пазітыўную ролю ў грамадскім жыцці вобласці і стаў яго інтэгральнай часткай».

«Касцёл Калініграда! Ты прайшоў вялікі і складаны шлях адраджэння і станаўлення і сёння пачынаеш пісаць новую старонку сваёй гісторыі. Заставайся і далей адкрытым на дзеянне Святога Духа, будзь верным сваёй багатай спадчыне і місіі абвяшчэння Евангелля, вядзі людзей да брамаў Божай міласэрнасці», — заклікаў арцыбіскуп Тадэвуш Кандрусевіч. Іерарх заахвоціў Касцёл у Калініградзе «смела ісці ў новы час з новай надзеяй і заўсёды быць сакрамэнтам усеагульнага збаўлення».

Фота Аксаны Сцежка(AG)