29-30 сакавіка ў мінскай парафіі Св. Яна Хрысціцеля праходзіла фармацыйная сустрэча для салезіянскіх аніматараў. Маладыя людзі, якія імкнуцца служыць іншым, асабліва дзецям і моладзі, мелі добрую магчымасць атрымаць некаторыя парады, з дапамогай якіх іх служэнне можа прыносіць больш плёныя вынікі.

Кіруючыся думкай, што немагчыма навучыцца любіць і служыць па-сапраўднаму, калі не будзеш прыгадваць вобраз Езуса – богачалавека, які стаў з людзьмі на адзін узровень, каб іх адкупіць, аніматары падчас першай канференцыі, якую праводзіў кс. Іван Огар SDB, паспрабавалі саставіць фотаробат Езуса, Бога і чалавека адначасова. Да прысутных даносілася думка, што Езус не цураецца простых чалавечых пачуццяў – Ён плача над труной Лазара, спачувае ўдаве ці пракажонаму; Езус выступае супраць усялякага падзялення, хоча дастукацца да кожнага, і часам дзеля гэтага пераварочвае шкалу вартасцяў асобнага чалавека, выкрывае рэлігійную крывадушнасць і пытаецца: “А вы за каго прымаеце Мяне?”
 
“Для Езуса адносіны – гэта сустрэча. І ў гэтай сустрэчы Езус чакае ад нас даверу. Калі ты не паверыш і будзеш толькі назіральнікам– не ўвойдзеш на гэтую сустрэчу”,  - падкрэсліў кс. Іван Огар.
 
Пасля ў аніматараў была магчымасць сустрэцца з Езусам, які нясе крыж на Галгофу, і разам з Ім прайсці Крыжовы шлях.
 
Другі дзень сустрэчы меў больш практычны характар. У араторый завітаў фатограф Андрэй Каханоўскі, які дзяліўся з прысутнымі сакрэтамі паспяховай фатаграфіі і відэазапісу. Пасля тэорыі кожны меў магчымасць паспрабаваць сябе ў якасці фатографа на практыцы.
 
У праграме прысутнічалі таксама гульні, моманты разважанняў над сваім духоўным жыццём, сустрэча з Езусам ў Эўхарыстыі.

Паводле serebranka.sdb.by

(AG)

Фота serebranka.sdb.by