28-30 сакавіка ў мінскай парафіі Узвышэння Святога Крыжа на Кальварыі адбыліся велікапосныя рэкалекцыі. Правёў іх ксёндз Андрэй Яркавец, пробашч парафіі Унебаўзяцця Найсвяцейшай Панны Марыі ў Красным.

У першы дзень разважанні рэкалекцыяніста былі скіраваны да Крыжа Хрыста. Ставілася пытанне, ці жадаюць вернікі ўважліва прыгледзецца да крыжа ўласнага жыцця. Па словах святара, пры нараканнях на лёс, недаверу да моцы малітвы злы дух пачынае накіроўваць думкі чалавека ў процілеглы бок. Рэкалекцыяніст падкрэсліў, што слова "вернік" у першых хрысціян азначала "паслухмяны Богу", сучасны ж чалавек жадае "карэктаваць" Яго волю. У якасці пацвярджэння святар прывёў шматлікія прыклады з жыцця, падсумаваўшы, што пераадоленне ўласнай ганарыстасці, шчырая малітва, бязмежны давер Богу, паклаўшыся на Яго бясконцую мудрасць і любоў, прынясе спакой душы.

У другі дзень размова ішла аб сумленным выкананні прафесійных абавязкаў – у тых выпадках, калі трэба паступацца ўласнымі перакананнямі. Размова ішла аб працы ўрача, абортах, дзетазабойстве. Святар выказаў думку, што Бог міласэрны, але адначасова справядлівы суддзя, і ва ўсім трэба паступаць па сумленні, адкінуўшы ганарыстасць. Рэкалекцыяніст засяродзіў увагу на прыпавесці аб фарысеі і мытніку з Евангелля, адзначыўшы, што чалавек ганарлівы з лёгкасцю апраўдвае сябе і свае ўчынкі. Святар пажадаў прысутным, каб час Вялікага посту ўмацаваў у іх давер і сувязь з Богам.

Трэці дзень быў прысвечаны разважанням аб Божым Провідзе і паслухмянасці. Рэкалекцыяніст прывёў прыклады з жыцця першых хрысціян, нагадаў аб іх мучаніцкай смерці ад драпежных жывёл на арэне Калізея, дадаўшы, што пра гэта павінен памятаць сучасны хрысціянін. Па словах святара, да тых, хто прагне духоўнасці, давярае Богу, узнагарода заўсёды прыйдзе, але менавіта тады, калі чалавек будзе найбольш падрыхтаваны да гэтага дару, і, якім бы цяжкім не быў Крыжовы шлях па дарозе жыцця, за ім заўсёды прыйдзе ўваскрашэнне.

Па заканчэнні рэкалекцый святар падарыў кожнаму ўдзельніку абразок святой Рыты.