22 чэрвеня кс. Раман Суша цэлебраваў першую ў сваім жыцці Св. Імшу ў родным Касцёле Узвышэння Св. Крыжа ў Вілейцы. Перад пачаткам Св. Імшы на парозе святыні прыміцыянта сустрэў пробашч парафіі кс. Аляксандр Барыла, які шчыра запрасіў маладога святара наблізіцца да алтара, каб першы раз скласці на ім Ахвяру Хрыста.

Напрыканцы святой Імшы кс. Раман прысвяціў сваё святарскае служэнне Найсвяцейшаму Сэрцу Езуса і Маці Божай Шкаплернай. Новапрэзбітар звярнуўся са словамі падзякі Богу, сваім бацькам, ксяндзу-пробашчу і ўсім, хто быў побач і дапамагаў на шляху да святарства, а таксама папрасіў усіх прысутных б малітве ў сваёй інтэнцыі. Парафіяне павіншавалі кс. Рамана з атрыманнем вялікага і адказнага дару святарства і пажадалі быць святым святаром паводле Сэрца Езуса.

Пасля Эўхарыстыі кожны з прысутных атрымаў з рук кс. Рамана папскае благаслаўленне і абразік, на якім напісаныя наступныя словы: «… Я пасылаю вас як авечак паміж ваўкоў. Таму будзьце разважлівыя, як змеі, і простыя,як галубы» (Мц 10, 16) і  «Спакой Мой даю вам. Не так, як дае свет, Я вам даю»(Ян 14, 27).

Кацярына Дурко