10 жніўня 2014 г. у санктуарыі Маці Божай Будслаўскай завяршыліся назарэтанскія рэкалекцыі для дзяўчат. У рэкалекцыях прынялі ўдзел 30 чалавек - з Ліды, Шчучына, Смаргоні, Гродна, Наваельні, Жэмыслаўля, Жодзіна.

Духоўна накіроўваў удзельніц ксёндз Дзмітрый Дубовік, які прадставіў ім постаці біблейскіх жанчын: Руф, Эсфір, Марыі і Марты, Найсвяцейшай Панны Марыі. У канферэнцыях святар заклікаў дзяўчат кіравацца ў жыцці іх якасцямі і каштоўнасцямі, быць мужнымі, вучыцца давяраць Пану, займаць сваё месца, захоўваць цнатлівасць і шукаць сваё пакліканне.

Паглыбіцца ў Божую прысутнасць на рэкалекцыях дапамагалі “скрутацыі” - асабістыя сустрэчы з Божым словам, а таксама штодзённая святая Імша, малітва Літургіі гадзін і адарацыя Найсвяцейшага Сакрамэнту.

Умовы жыцця былі сціплымі, таму што хатка сясцёр назарэтанак у Будславе невялікая, але гасціннасць с. Хэлены засланіла ўсю невыгоднасць, а смачная ежа прыпадобніла памяшканне да маленькага гатэля.

Паводле grodnensis.by

(AG)