14 верасня, у свята Узвышэння Святога Крыжа, адбылася адпустовая ўрачыстасць у парафіі Узвышэння Святога Крыжа ў Вілейцы. Адпустовую святую Імшу ўзначаліў кс. Кірыл Бардонаў, які паходзіць з гэтай парафіі.

Таксама ў гэты дзень парафію наведаў дырэктар Дабрачыннага каталіцкага таварыства «Карытас» Мінска-Магілёўскай архідыяцэзіі кс. Аляксандр Фамяных, які калісьці служыў у Вілейцы дыяканам.

Пробашч парафіі кс. Аляксандр Барыла ў сваёй прамове адзначыў, што Крыж Хрыста – алтар, на якім здзейснілася Ахвяра нашага збаўлення.

У гаміліі кс. Кірыл Бардонаў распавёў гісторыю свята Узвышэння Св. Крыжа і адзначыў, што Крыж можа несці толькі той, хто апрануты ў духоўную вопратку пакоры. Крыж, па словах святара, дазваляе ўзнесціся над штодзённасцю і над самой смерцю. Святар прапанаваў паразважаць над прыкладам Езуса Хрыста, які прынізіў самога сябе, стаўшы чалавекам, і аддаў за людзей жыццё, а напрыканцы гаміліі дадаў, што гэтае свята заахвочвае трымацца Крыжа, у якім абяцанне таго, што дабро пераможа.

Імша завяршылася эўхарыстычнай працэсіяй вакол касцёла. Пасля дзеці і моладзь парафіі прадставілі невялікую інсцэніроўку на тэму каштоўнасці жыцця і яго абароны. Гэтая пастаноўка заняла чацвёртае месца і была асабліва адзначана журы на Міжнароднай Парафіядзе ў Варшаве. Яе змест падкрэслівае вялікую каштоўнасць кожнага жыцця, якое пачынаецца з моманту зачацця.

Паводле vilejka.by

(AG)