У першую нядзелю Адвэнту, 30 лістапада, парафію святога Мікалая, біскупа, у Свіры наведаў дырэктар «Caritas» Мінска-Магілёўскай
архідыяцэзіі кс. Аляксандр Фаміных і супрацоўніца гэтага дабрачыннага каталіцкага таварыства Вольга Камінская.

У парафіяльных капліцах св. Войцеха ў Вялікай Страчы і св. Пятра і Андрэя ў Дабраўлянах, а таксама ў касцёле св. Мікалая ў Свіры кс.
Аляксандр Фаміных прамовіў да вернікаў гаміліі, у якіх прадставіў сапраўдны сэнс перыяду падрыхтоўкі да Божага Нараджэння, адзначыўшы, што мераю духоўнага жыцця хрысціяніна з’яўляецца не колькасць выкананых ім абрадаў і зробленых ахвяраванняў, а вера, якая дзейнічае праз любоў, што на лаціне называецца сaritas.

Святар распавёў таксама пра дзейнасць «Карытас» Мінска-Магілёўскай архідыяцэзіі, пра некаторыя праекты, якія
рэалізуе гэтая дабрачынная каталіцкая арганізацыя, і пра цяжкасці, з якімі яе супрацоўнікі сутыкаюцца ў штодзённым служэнні.

Вернікі свірскай парафіі падтрымалі дзейнасць дабрачыннага каталіцкага таварыства «Caritas» Мінска-Магілёўскай архідыяцэзіі сваімі ахвяраваннямі, а таксама набылі прывезеныя супрацоўнікамі рэлігійнай місіі свечкі, святло якіх за вігілійным сталом будзе сімвалізаваць салідарнасць з патрабуючымі, і музычныя дыскі са спевамі ў гонар Найсвяцейшай Панны Марыі ў выкананні вакальнага гурта «Беларусы».

Першая нядзеля Адвэнту стала ў Свіры сапраўды нядзеляй міласэрнай любові, без якой немагчыма ўявіць сабе шлях адвэнтавага чакання і навяртання.

Дыякан Мікалай Гракаў