29 лістапада ў парафіі Святога Андрэя, апостала, прайшлі дэканальныя моладзевыя «Андрэйкі», на якіх быў праведзены  конкурс  ведаў «Дастаткова толькі Бога», прысвечаны 500-годдзю нараджэння святой Тэрэзы Авільскай.

У нарачанскую парафію на свята разам са сваімі святарамі і законнымі сёстрамі прыехала моладзь з Будслава, Мядзела, Свіры і  Канстанцінава.

Свята распачалося святой Імшой, якую цэлебраваў а. Аркадзь Куляха OCD. У гаміліі святар нагадаў моладзі пра жыццёвы шлях святой Тэрэзы ад Езуса і заклікаў маладых людзей у сучасным свеце па прыкладзе гэтай кармэлітанкі быць сведкамі Хрыста і Евангелля.

Пасля святой Імшы адбыўся конкурс ведаў «Дастаткова толькі Бога», у якім прыняло ўдзел больш за сто чалавек.

Працягнулася свята дыскатэкай з забаўляльнай праграмай, падчас якой моладзь весела бавіла час, а журы падводзіла вынікі конкурсу.
Першае месца ў конкурсе было прысуджана Аліне і Анэце Грышкевічам з Нарачы, Надзеі Сіськевіч і Ірэне Ахрамовіч з Нарачы, а таксама Дзянісу Гушчу з Мядзела.

Завяршылася свята ўручэннем падарункаў пераможцам конкурсу і супольнай малітвай.

Паводле nachacz.na.by, (IL)