7 снежня пасля Імшы ў араторыі св. Дамініка Савіо ў Бараўлянах дзеці і моладзь сабраліся на свята, на якое завітаў святы Мікалай. Свята адбылося з нагоды ўрачыстасці Беззаганнага Зачацця Найсвяцейшай Панны Марыі — важнага для салезіянскай сям’і дня, бо 8 снежня св. Ян Боско распачаў працу першага араторыя.

Напярэдадні, у суботу, святы Мікалай ужо наведваў дзяцей у бараўлянскім араторыі, каб парадаваць падарункамі маленькіх вернікаў, якія штодня ўдзельнічаюць у раратніх Імшах. У нядзелю святы затрымаўся ў араторыі, каб пазнаёміцца з дзецьмі, распавесці ім пра сябе, пра тое, якія сапраўдныя і несапраўдныя звычаі і героі з’явіліся ў розных краінах свету праз яго, навучыць турэцкім танцам і павесяліцца, бавячы час у гульнях, якія нарадзіліся на Вальдокка ў араторыі св. Яна Боско.

Моладзь, якая разам са святаром і сястрой законнай падрыхтавала свята, прадставіла сцэнку аб тым, як пры сустрэчы ксяндза Боско з Барталамео Гарэллі пачалася дзейнасць першага салезіянскага араторыя. Яднаючыся з усім салезіянскім светам, які па традыцыі кожны год 8 снежня а 12-й гадзіне яднаецца ў «Марыйнае кола», молячыся адну «Вітай, Марыя», усе ўдзельнікі свята: святары, моладзь, дзеці, дарослыя — даручылі Маці Божай дзейнасць бараўлянскага і ўсіх іншых араторыяў, каб кожны малады чалавек і кожнае дзіця, якія іх наведваюць, маглі з упэўненасцю крочыць да святасці.

Падобна да таго, як у турынскім араторыі св. Ян Боско заўсёды клапаціўся не толькі аб духоўным, але і фізічным пасілку, у Бараўлянах на завяршэнне мерапрыемства адбыўся салодкі стол.

Паводле www.sdb.by

(AG)

Фота www.sdb.by