21 снежня ў мінскі архікатэдральны касцёл Імя Найсвяцейшай Панны Марыі прыбыў Бэтлеемскі агонь. Ва ўрачыстай цырымоніі прыбыцця агню прыняў удзел і Мітрапаліт Мінска-Магілёўскі арцыбіскуп Тадэвуш Кандрусевіч. 

Пасля ўнясення агню ў святыню распачалася святая Імша, якая завяршала трохдзённыя адвэнтавыя рэкалекцыі ў архікатэдральнай парафіі. Рэкалекцыі ў гэтым годзе праводзіў кс. Дзмітрый Пухальскі.

Пасля ўсталявання Бэтлеемскага агню перад алтаром са словам да вернікаў звярнуўся Мітрапаліт Тадэвуш Кандрусевіч. Іерарх падзякаваў скаўтам за тое, што ўжо чарговы раз яны прынеслі агонь у сталіцу Беларусі. Паводле слоў арцыпастыра, прынясенне Бэтлеемскага агню перад Божым Нараджэннем стала добрай традыцыяй, якая ажыццяўляецца дзякуючы служэнню скаўтаў.

Таксама Мітрапаліт распавёў прысутным аб сімволіцы і гісторыі пілігрымавання Бэтлеемскага агню. Арцыбіскуп адзначыў, што агонь называецца агнём міру і што запаленая свечка з'яўляецца сімвалам Хрыста.

«Сёння мы дакранаемся да агню, які прыбыў да нас з Бэтлеема, дзе цела сталася хлебам і дзе Сын Божы стаўся чалавекам. Бэтлеемскі агонь называецца Святлом міру і запальваецца ў Гроце Нараджэння Езуса Хрыста ў Бэтлееме. Бэтлеемскае Святло міру з’яўляецца сімвалам цеплыні, любові, міру і надзеі. Традыцыйна яго ставяць на вігілійным стале», — распавёў іерарх.

Арцыпастыр нагадаў, што калісьці нават падчас вайны на Божае Нараджэнне ваюючыя бакі аб’яўлялі перамір’е.

У гэтым годзе Бэтлеемскі агонь рапаўсюджваецца пад дэвізам «Супакой у нас».

У Беларусь праз Славакію і Польшчу

У Беларусь Бэтлеемскі агонь прыбыў з Аўстрыі. Менавіта ў Вене распачалася гэта традыцыя прынясення агню з Бэтлеема. Упершыню гэта адбывалася па ініцыятыве радыё Аўстрыі і тэлебачання г. Лінца, як дабрачынная акцыя на карысць патрабуючых і дзяцей з абмежаванымі магчымасцямі.

Дзякуючы ўдзелу ў гэтай акцыі скаўтаў, Бэтлеемскі агонь распаўсюджваецца па ўсёй Еўропе. Агонь штогод прыносіцца з Бэтлеема ў катэдру ў Вене і перадаецца скаўтам суседніх краін, якія ў сваю чаргу перадаюць яго сваім суседзям і г.д. Такім чынам ён трапляе ў найбольш далёкія куткі Еўропы. 

У Беларусь агонь прыбыў праз Славакію і Польшчу.

Паводле слоў Паўла Граковіча, начальніка cекцыі скаўтаў парафіяльных скаўцкіх груп Беларусі, прывезены ў Мінск агонь будзе перададзены ў восем сталічных парафій, а таксама «дойдзе» і да шэрагу парафій у Беларусі, сярод якіх у тым ліку Мар’іна Горка, Асіповічы, Магілёў, Барысаў, Івянец і інш.

На заканчэнне святой Імшы Мітрапаліт заахвоціў вернікаў узяць Бэтлеемскі агонь дадому і ставіць яго на вігілійны стол, каб сапраўдны Божы супакой панаваў у сэрцах людзей і каб яны сталі пратаганістамі гэтага супакою.

«Няхай жа гэты агонь будзе сімвалам Езуса, які нараджаецца ў вашых сэрцах. І няхай надыходзячыя святы стануць сапраўдным духоўным супакоем для вас», — адзначыў арцыбіскуп Тадэвуш Кандрусевіч. 

(DN), (AG), (JLS)

Фота Аляксандры Шчыглінскай