Незвычайная кніга, якая апісвае становішча Каталіцкага Касцёла на беларускіх тэрыторыях у 1786 годзе, перакладзена на беларускую мову і падрыхтавана да друку.

Пра гэта ў размове з карэспандэнтам Catholic.by паведаміў дырэктар музея гісторыі Магілёва Аляксей Бацюкоў. Паводле яго слоў, унікальнасць кнігі ў тым, што яна апісвае стварэнне Магілёўскай дыяцэзіі і той час, калі дыяцэзію ўзначальваў Станіслаў Богуш-Сестранцэвіч.

«Беларуская архідыяцэзія будзе прызнаная Рымам на дзесяцігоддзе пазней, і стане самай вялікай у свеце па тэрыторыі», — дадае Аляксей Бацюкоў.

Арыгінал кнігі 1786 года быў перададзены Музею гісторыі Магілёва Алесем Чайчыцам з Масквы. Пераклад на беларускую мову здзейсніў Алег Давід Лісоўскі, які жыве ў Германіі.

Упершыню кніга «Merkwürdige Nachrichten von den Jesuiten in Weißrussland» выйшла ў Германіі ў 1785 годзе і стала нямецкім перакладам італьянскай кнігі ў лістах. Праз год кнігу перавыдалі ў Германіі яшчэ раз. Аўтарам нямецкага выдання выступіў нямецкі гісторык Крыстаф Готліб фон Мур.

«Кніга апавядае пра складаную і супярэчлівую сітуацыю, што склалася вакол лёсу Каталіцкага Касцёла і Ордэна езуітаў на тэрыторыях Рэчы Паспалітай, што адышлі да Расійскай імперыі пасля падзелу 1772 г. Ордэн, скасаваны Папам Кліментам XIV у 1773 г., фактычна працягваў існаваць на гэтых тэрыторыях, — зазначае Аляксей Бацюкоў. — Няясным заставаўся і статус католікаў на землях цяпер ужо Расійскай імперыі, бо ў Расіі не існавала каталіцкай дыяцэзіі на той час. Езуіты, што захаваліся на беларускіх землях, працягвалі сваю працу і нарэшце дачакаліся ўсясветнага аднаўлення дзейнасці Ордэна».

Cкладаны і інтрыгоўны час — у лістах, цыркулярах, рэляцыях, адозвах — пададзены ў кнізе ад першых асоб, што дзейнічалі ў Ватыкане, Маскве і Магілёве.

Выданне кнігі будзе ажыццяўляцца па падпісцы, кошт аднаго экзэмпляра каля 200 000 бел. руб. (пры павелічэнні колькасці падпісчыкаў кошт зменшыцца). Усе зацікаўленыя змогуць замовіць асобнік кнігі праз электронную пошту музея гісторыі ў Магілёве Гэты e-mail адрас абаронены ад спаму-ботаў, для яго прагляду ў Вас павінен быць уключаны Javascript .

Ілья Лапато