3 лютага ў мінскім касцёле святых Сымона і Алены прайшла пастырская сустрэча духоўных асобаў Мінска-Магілёўскай архідыяцэзіі. Святую Імшу ў межах сустрэчы ўзначаліў дапаможны біскуп Мінска-Магілёўскай архідыяцэзіі Юрый Касабуцкі.

Cустрэча прайшла ў дзень, калі Касцёл успамінае св. Блажэя, біскупа і мучаніка. У сваёй гаміліі біскуп Юрый Касабуцкі звярнуў увагу на веру і яе ролю ў жыцці чалавека:

«Вера з’яўляецца ўмоваю збаўлення. Пра гэта мы чуем у Святым Пісанні, асабліва ў Новым Запавеце. Вера — дарога да збаўлення. Хто паверыць і ахрысціцца – будзе збаўлены, хто не паверыць — будзе асуджаны. Але сапраўдная вера — гэта не значыць проста ведаць штосьці пра Бога. Сапраўдная вера — гэта давер Богу».

Біскуп Юрый Касабуцкі падкрэсліў, што ў дыялогу з Богам вельмі важная малітва:

«Калі чалавек па-сапраўднаму верыць, ён не можа не звяртацца да Бога і не размаўляць з Ім. Гэта азначае, што малітва не можа адсутнічаць. Не можа быць так, каб чалавек, ведаючы пра існаванне Бога і Яго запаведзі, адварочваўся ад Яго спіной і не маліўся. Такая вера — мёртвая».

«Калі чалавек верыць і давярае Богу, то імкнецца падтрымліваць з Ім кантакт  і размаўляць з Богам», — заключыў біскуп.

Іерарх нагадаў, што чалавек не можа называцца веруючым, калі ён жыве ў стане граху, калі прагне помсты і жыве ў нянавісці.

Падчас Імшы ва ўспамін св. Блажэя былі таксама асвечаны свечкі. Біскуп Юрый Касабуцкі нагадаў пра іх сімвалізм і падкрэсліў, што яны павінны быць сімвалам узмацнення веры.

Традыцыя прыкладаць асвечаныя свечкі да горла вернікаў, благаслаўляючы іх, ва ўспамін св. Блажэя пайшла з таго часу, калі адбыўся цуд аздараўлення хлопчыка, у горле якога засела костка рыбы. Біскуп Блажэй быў лекарам, і Бог праз яго заступніцтва ўчыніў шмат цудаў, адным з якіх і быў вышэй паданы выпадак. 

(IL), (ASh)