У беларускім календары няма асобнага дня бабулі і дзядулі, аднак кожны ведае, якую важную ролю яны адыгрываюць у выхаванні сваіх унукаў. Сказаць «дзякуй» за іх любоў і апеку вырашылі выхаванцы «Місіі добрага самараніна».

Дзеці падрыхтавалі канцэрт і сувеніры. А місія «Чыстае сэрца» вырашыла падтрымаць дзяцей і падрыхтавала для іх падарункі.

7 лютага місія «Чыстае сэрца» наведала выхаванцаў місіі «Добрага самараніна пад заступніцтвам св. Уршулі Ледухоўскай» у Мінску. Ужо ў другі раз місія «Чыстае сэрца» падтрымала дзяцей, якія ў святочнай праграме падзякавалі сваім бабулям і дзядулям за ўсё іх дабро. Падарункі дзецям ад арганізацыі ўручыў Мітрапаліт Мінска-Магілёўскі арцыбіскуп Тадэвуш Кандрусевіч.

Іерарх адзначыў важную ролю хрысціянскага выхавання ў беларускіх сем’ях, пачынаючы з самага дзяцінства. Мітрапаліт падзякаваў усім дзецям за стараннасць, а іх бацькам, бабулям і дзядулям — за перадачу веры маладому пакаленню.

Усяго ў місіі «Добрага самараніна пад заступніцтвам св. Уршулі Ледухоўскай» налічваецца 27 выхаванцаў дашкольнага ўзросту.

Святлана Жылевіч
фота Міланы Антаневіч