У парафіі Маці Божай Ружанцовай у мікрараёне Лошыца ў Мінску адбылася Імша падзякі ў гадавіну прыняцця Першай святой Камуніі. Восем дзяцей, якія летась упершыню прынялі святую Камунію, разам з бацькамі і парафіянамі сабраліся на святую Імшу, каб падзякаваць за атрыманыя ласкі.

Прамаўляючы да прысутных, пробашч кс. Генадзь Кухарэвіч сказаў: “Мы хочам сёння асаблівым чынам падзякаваць за самыя вялікія дары – за хрост і Эўхарыстыю. Любыя дзеці! Які добры Езус Хрыстус! Увесь год Ён запрашаў вас на сваю Святую Вячэру, бо вы з’яўляецеся Ягонымі дзецьмі. Падзякуем Яму за гэта ад усяго сэрца”.

Пробашч таксама прыгадаў словы Евангелля, заклікаючы бацькоў і прысутных маліцца за дзяцей, каб не паддаліся спакусам і вытрывалі ў веры, як маліўся за сваіх вучняў Езус Хрыстус.

У прысутнасці бацькоў і парафіянаў дзеці вызналі сваю веру і выракліся зла. Затым у постаці хлеба і віна яны ўрачыста прынялі Езуса Хрыста.

На завяршэнне дзеці і бацькі падзякавалі пробашчу за магчымасць атрымоўваць з яго рук святыя сакрамэнты, за падрыхтоўку да іх атрымання, праведзеную ўрачыстасць і дапамогу ў яе арганізацыі. Кожны з дзяцей атрымаў абраз на ўспамін гадавіны Першай Камуніі.

Галіна Абакунчык