19–20 чэрвеня адбылася сустрэча працуючай моладзі і маладых сем’яў парафіі Узвышэння Святога Крыжа ў Вілейцы. Месца і стыль сустрэчы былі выбраны адмыслова, бо 10 гадоў таму гэтыя ж, тады яшчэ маленькія, хлопцы і дзяўчаты першы раз сабраліся на рэкалекцыі на беразе в. Нарач разам з пробашчам парафіі кс. Аляксандрам.

Пасля падобныя духоўныя практыкаванні адбываліся з палаткамі на ўлонні прыроды Вілейскага вадасховішча. Сёння многія з удзельнікаў прыехалі ўжо са сваімі сем’ямі, некаторыя нават маюць сваіх дзяцей, але як і ўсе 10 гадоў, так і сёння гэтых людзей аб’ядноўвае Бог, вера і жаданне па-сапраўднаму жыць з Богам.   

Сустрэча распачалася Эўхарыстыяй на беразе Слабадскога возера. У гаміліі пробашч парафіі пажадаў удзельнікам заўсёды заставацца маладымі, нягледзячы на час, жыццёвыя клопаты і праблемы, і заўсёды жыць з Богам.

Потым удзельнікі мерапрыемства гатавалі ўху, смажылі рыбу і пасля працоўнага тыдня і шуму горада цешыліся цішынёй ляснога кутка.

У першыя хвіліны суботы 20 чэрвеня моладзь смажыла шашлык і праслаўляла Бога спевамі каля вогнішча, а таксама сустрэла ўзыход сонца, чаму не перашкодзіла пахмурнае неба.

Сустрэча скончылася малітвай падзякі Богу, чэрвеньскім набажэнствам і спевам да Маці Божай Будслаўскай, які стаў традыцыйным заканчэннем усіх мерапрыемстваў вілейскай парафіі.

Кацярына Дурко