Нягледзячы на капрызнае надвор’е, 15 ліпеня ўдзельнікі завяршылі спаборніцтвы ў эстафеце, міні-футболе, валейболе і настольным тэнісе. Пасля іх чакала паласа перашкод, якую падрыхтавалі скаўты.

Удзельнікі мелі магчымасць праявіць сябе і ў валоданні біблійнымі ведамі, а ўвечары прадставілі рэлігійную і свецкую песні. У якасці журы конкурсаў спеваў быў запрошаны госць – Валерый Мулявін, арт-дырэктар музычнага гурта “Белая Русь”.

У канцы вечара для гасцей парафіяды зайграў музычны гурт “Light of life”, які нарадзіўся і развіваецца ў Івянцы.

Раніцу 16 ліпеня, як і кожную раніцу парафіяды, удзельнікі распачалі малітвай. Пасля сняданку адбылася святая Імша, на якой хлопцы і дзяўчаты разам падзякавалі Пану Богу за час спаборніцтваў, за новых сяброў, за дасягненні і паражэнні. Падчас Імшы да ўдзельнікаў скіраваў сваё слова ксёндз прэлат Андрэй Стэцкевіч.

Завяршылася парафіяда ўзнагароджаннем пераможцаў у конкурсе рэлігійных ведаў і конкурсе свецкай песні, па выніках спаборніцтваў па паласе перашкод, і, самае галоўнае, сталі вядомыя пераможцы парафіяды ў камандным заліку. Трэцяе месца заняла каманда са Свіры, другое – каманда з Мядзеля. Пераможцам VI Парафіяды стала каманда парафіі Святога Міхала Арханёла ў Івянцы. Менавіта гэтая каманда прадставіць Беларусь у наступным годзе на Міжнароднай парафіядзе ў Польшчы.

Таксама на цырымоніі закрыцця парафіяды былі складзены падзякі суддзям спартыўных спаборніцтваў, валанцёрам і духоўным асобам, якія прысвяцілі час на дапамогу ў яе правядзенні.

Парафіяда – гэта добры час, каб развівацца праз удзел у трох асноўных накірунках – тэатры, святыні і спорце; гэта добрая нагода не толькі для таго, каб паказаць свае здольнасці, але і каб навучыцца бачыць у іншым чалавеку сябра, лічаць арганізатары і ўдзельнікі Парафіяды Мінска-Магілёўскай архідыяцэзіі.

(AG)