На апошнім тыдні лета ў парафіі Св. Яна Евангеліста і св. Максімільяна М. Кольбэ ў Мінску адбыліся «Канікулы з Богам» для дзяцей і моладзі.

Канікулы праходзілі ў місійным духу пад дэвізам «100% майго сэрца для Езуса».

На працягу тыдня дзеці пачыналі кожны дзень супольнай малітвай за місіі і ўдзелам у святой Імшы. Завочна падарожнічаючы па пяці місійных кантынентах свету, яны даведваліся аб часта складаных умовах жыцця сваіх равеснікаў, напрыклад у Афрыцы: адсутнасці дастатковай колькасці вады, ежы, магчымасці вучыцца і атрымоўваць медыцынскую дапамогу. Цікавай і вельмі пазнавальнай стала сустрэча з місіянерам ксяндзом Маркам.

Канікулы прайшлі вельмі весела і рознабакова: дзеці наведалі Цэнтр Акіянаграфіі, удзельнічалі ў майстар-класах, паказалі свае здольнасці ў конкурсе «Скарбніца талентаў», у час экскурсіі прайшлі па славутых мясцінах горада Мінска, акунуліся ў жывёльны свет заапарка. Насычаным спартыўнымі спаборніцтвамі і цікавымі займальнымі гульнямі атрымаўся адпачынак на ўлонні прыроды.

У час «Канікул з Богам» дзеці вучыліся многаму: спачуваць і не быць абыякавымі, цаніць і быць удзячнымі, маючы – умець дзяліцца, любіць і аддаваць 100% свайго сэрца Езусу.

Людміла Паталей