5 верасня ў архікатэдральным касцёле Iмя Найсвяцейшай Панны Марыі ў Мінску адбыўся чарговы дзень супольнасці «Хатні Касцёл» руху «Святло – Жыццё». Сустрэча, у якой прынялі ўдзел сем’і з Мінска, Магілёва і Маладзечна, была прысвечана пачатку чарговага года фармацыйнай працы.

Гэты год у супольнасці пройдзе пад дэвізам «У моцы Святога Духа».

Сустрэча па традыцыі пачалася ружанцовай малітвай у інтэнцыі сем’яў. Святую Імшу для ўдзельнікаў сустрэчы цэлебраваў дыяцэзіяльны мадэратар супольнасці кс. Павел Шылак.

Падчас канферэнцыі аніматарская дыяцэзіяльная пара супольнасці азнаёміла прысутных з лістам Цэнтральнага кола «Хатняга Касцёла», прысвечаным разважанням для плённага перажывання чарговага фармацыйнага года. Потым кожнае сужэнства супольнасці атрымала абразкі Арханёла Рафала – апекуна сем’яў – і тэксты малітваў да Анёла Ахоўніка мужа і Анёла Ахоўніка жонкі, з прапановай і заахвочваннем да гэтай малітвы.

Завяршылася сустрэча ўрачыстым абедам, падчас якога былі абмеркаваны мерапрыемствы супольнасці «Хатні Касцёл» на 2015/2016 год працы.

Алена i Аляксандр Латушкiны