14 верасня Касцёл адзначае свята Узвышэння Святога Крыжа. Напярэдадні ў мінскай парафіі Узвышэння Святога Крыжа на Кальварыі пачалося святкаванне парафіяльнай урачыстасці. Святую Імшу ўзначаліў дапаможны біскуп Мінска-Магілёўскай архідыяцэзіі Юрый Касабуцкі.

Таксама падчас Імшы 15 чалавек прынялі сакрамэнт канфірмацыі.

Лічыцца, што 14 верасня 335 г. была асвечана святыня над пячорай Гробу Пана, дзе ўстанавілі знойдзены Крыж Збаўцы. Каб шматлікія хрысціяне, прысутныя на ўрачыстасці, маглі ўбачыць вялікую святыню, біскуп узнімаў («узвышаў») Крыж над галовамі прысутных. У Рыме свята Узвышэння Святога Крыжа было ўведзена Папам Грыгорыем І.

У гаміліі падчас Імшы біскуп Юрый Касабуцкі нагадаў аб гісторыі гэтага свята, заклікаўшы парафіян да радасці, надзеі і жыцця верай. Іерарх адзначыў важнасць для чалавека прыкладу веры, дадаў, што сучаснаму свету патрэбны сведкі, а Дух Святы дае моц сведчання, як калісьці ўмацаваў апосталаў і даў ім адвагу.

Прымаючых сакрамэнт канфірмацыі біскуп заклікаў адкрыцца на дзеянне Духа і быць сведкамі веры.

Напрыканцы канфірмаваныя падзякавалі за гэты дар моцы Святога Духа і атрымалі памятныя крыжы з нагоды свята Узвышэння Святога Крыжа. Біскуп Юрый Касабуцкі пажадаў усім вернікам моцы Духа Святога ў жыцці паводле Божага закону, у абароне веры і яе ўмацаванні ў сучасным свеце.

Станіслава Ледзянёва