17 верасня ў архікатэдральным касцёле Імя Найсвяцейшай Панны Марыі адбылася пастырская сустрэча духавенства Мінска-Магілёўскай архідыяцэзіі. Святую Імшу ў межах пастырскай сустрэчы ўзначаліў Мітрапаліт Мінска-Магілёўскі арцыбіскуп Тадэвуш Кандрусевіч.

Разважаючы ў гаміліі над чытаннем Евангелля гэтага дня, Мітрапаліт звярнуў увагу, што ў ім паказана, як Езус прабачае грэшнай жанчыне, якая шкадуе за свае грахi. «Гэтым самым Езус нагадвае аб першынстве любовi. Божая любоў нас збавiла i мы, святары i кансэкраваныя асобы, павiнны яе абвяшчаць людзям, ставiць яе ў цэнтры нашага жыцця», — падкрэсліў іерарх.

Арцыбіскуп нагадаў, што жанчына ў евангельскім аповедзе прыйшла ў дом фарысея, куды быў запрошаны Езус, абмыла ногi Хрыста i памазала пахучымi алеямi. «Падобна як гэтая грэшная жанчына, таксама i мы атрымалi шмат ласкаў ад Бога. За гэтыя дары мы павiнны адудзячыць Яму падобнай любоўю», — сказаў Мітрапаліт.

«Як шмат людзей адчуваюць сябе пакiнутымi, баяцца наблiзiцца да эўхарыстычнага стала Пана i гадамi адчуваюць голад Божай ласкi. Нашым заданнем ёсць дапамагчы iм перамагчы самiх сябе i збурыць бар’еры, якiя аддзяляюць iх ад Бога», — на гэта іерарх звярнуў увагу прысутных духоўных асобаў.

Нагадваючы, што ў гэты дзень Касцёл успамінае св. Робэрта Бэлярмiна, якi жыў у XVI-XVIІ стагоддзi, быў адным з найбольш вядомых касцёльных iнтэлектуалаў свайго часу і асаблiва адзначаўся абаронай каталiцкай веры ў часы рэфармацыi, арцыпастыр адзначыў: «Святы Бэлярмiн прысвяцiў сваё жыццё абароне каталiцкай веры. Сёння мы ўсе паклiканы баранiць яе ад эрозii секулярызму i маральнага рэлятывiзму. Мы добра ведаем, як шмат крызiсаў перажывае сучасны свет i асаблiва сям’я».

Мітрапаліт дадаў, што сёння Касцёлу патрэбны пастыры фармату св. Робэрта Бэлярмiна, каб «мужна абвяшчаць не толькi Слова Божае, але і закладзеныя ў iм маральныя прынцыпы».

Арцыбіскуп пажадаў удзельнікам пастырскай сустрэчы, каб іх служэнне людзям было «служэннем мiласэрнасцi з захаваннем Божага права». «Бо калi мы будзем толькi нагадваць аб мiласэрнасцi, не зважаючы на захаванне Божага закону, то будзем падобныя да тых, хто перавязвае рану бiнтом, не паклаўшы на яе адпаведныя лекі, што можа прывесцi да пагаршэння хваробы», — патлумачыў іерарх.  

«Няхай дзякуючы нашаму служэнню раны духоўна хворых людзей будуць не толькi перавязаны бiнтом, але і памазаны лекамі Божай мiласэрнасцi, якая вылечыць чалавека, як вылечыла грэшную жанчыну, i заахвоцяць за любоў Бога адудзячыць любоўю да Яго i блiжнiх», — сказаў Мітрапаліт.

(AG)

Фота Аляксандры Шчыглінскай