10 кастрычніка адбылося адкрыццё новага навучальнага года 2015/2016 у «Школе сямейнага жыцця» ў Мінску. Раніцай некалькі дзясяткаў навучэнцаў школы сабраліся ў капліцы «Caritas» у Ляскоўцы на святой Імшы, якую ўзначаліў дапаможны біскуп Мінска-Магілёўскай архідыяцэзіі Юрый Касабуцкі.

У гаміліі іерарх паразважаў над чытаннем Евангелля гэтага дня, у якім гаворыцца: «Калі Езус прамаўляў да народа, адна жанчына з натоўпу ўзняла голас і сказала Яму: Шчаслівае ўлонне, якое насіла Цябе, і грудзі, якія кармілі Цябе! А Ён сказаў: Больш за тое, шчаслівыя, хто слухае слова Божае і захоўвае яго». Біскуп нагадаў пра задачы, якія рэалізуе «Школа сямейнага жыцця», між іншым пра навучанне Божаму слову. Іерарх назваў важным, каб веды, якія атрымліваюць навучэнцы, ішлі побач з учынкамі, дадаўшы, што недастаткова толькі слухаць, але трэба захоўваць гэтае Слова ў сваім штодзённым жыцці.

Біскуп адзначыў, што сёння важную ролю ў евангелізацыі адыгрываюць свецкія людзі - асабліва, напэўна, у справах, якія датычаць сужэнскіх праблем, з якімі сужэнцы не адважваюцца ісці да святара. Таму, заўважыў іерарх, неабходны добра падрыхтаваныя людзі, якія будуць здольнымі ў гэтых сітуацыях выслухаць, даць параду і скіраваць на размову са святаром, і падрыхтоўка такіх людзей таксама з’яўляецца задачай «Школы сямейнага жыцця».

Біскуп нагадаў, што ў гэтыя дні ў Ватыкане праходзіць Сінод Біскупаў на тэму сям’і, у якім прымае ўдзел Мітрапаліт Мінска-Магілёўскі арцыбіскуп Тадэвуш Кандрусевіч і на якім Айцы Сінода разважаюць над сітуацыяй сучаснай сям’і, яе радасцямі і крызісамі, шукаючы пад кіраўніцтвам Папы Францішка шляхоў дапамогі ёй.

Біскуп Юрый Касабуцкі пажадаў як навучэнцам, так і выкладчыкам «Школы сямейнага жыцця» плёнаў у новым навучальным годзе.

Пасля Імшы ў галоўнай зале адбылося афіцыйнае адкрыццё навучальнага года. Дырэктар школы а. Сяргей Трысцень OCD прывітаў усіх сабраных. Канцлер курыі Мінска-Магілёўскай архідыяцэзіі кс. магістр Дзмітрый Пухальскі выступіў з дакладам на тэму новага папскага дакумента «Mitis ludex Dominus Iesus», распавёўшы пра новыя прынцыпы, якія з 8 снежня гг. будуць дзейнічаць у Касцёле пры прызнанні несапраўднасці сужэнства.

Потым біскуп Юрый Касабуцкі уручыў 16 слухачам I года залікоўкі. Пасля пачастунку пачаўся навучальны дзень.

Сакратар Рады па справах сям’і пры ККББ а. Пётр Фраштэнга OCD, (AG)