3 студзеня дзеці і моладзь Вілейкі разам з парафіяльным хорам «Angeli» наладзілі святочную праграму, прысвечаную святу Божага Нараджэння.

Пасля заканчэння актавы Божага Нараджэння і перад урачыстасцю Аб’яўлення Пана ў вілейскім Палацы культуры адбыўся святочны канцэрт пад назвай «Бэтлеемская Зорка».

Праграма складалася з калядных спеваў парафіяльнага хора «Angeli», батлейкі і інсцэніровак, якія прадставілі дзеці і моладзь парафіі Узвышэння Святога Крыжа.

Таксама ў гэты вечар са сцэны гучалі вершы, а танцавальныя кампазіцыі выклікалі сапраўднае захапленне ў гледачоў. Праз усё гэта таленавітая моладзь вучыла бачыць прыгажосць і веліч свята Нараджэння Збаўцы.

У невялікай трыццаціхвіліннай п’есе маладым акцёрам удалося перадаць праўду аб незвычайнай ночы Божага Нараджэння, калі гучаць спевы анёлаў, свецяць знічы пастухоў, зіхаціць золата каралёў, а галоўнае — чуецца плач Немаўляці, першы крык уцелаўлёнай Любові, якую здольнае пачуць толькі чыстае сэрца ў цішыні.

Гэта аказалася проста: усім сэрцам прыняць радасную вестку, спыніць штодзённую мітусню, каб прыйсці да ясляў Збаўцы і прыняць Яго ў сваё жыццё.

Падчас канцэртнай праграмы да ўсіх прысутных словы віншавання са святам Божага Нараджэння скіравалі старшыня раённага савета дэпутатаў Наталля Радзевіч і пробашч вілейскай парафіі Узвышэння Святога Крыжа кс. Аляксандр Барыла.

Ганна Аўсейчык
Фота дк. Паўла Трона і Дзяніса Канецкага