Ва ўрачыстасць Аб’яўлення Пана ў Мінскай абласной клінічнай бальніцы ў пас. Лясны адбылася першая святая Імша. Ужо шмат гадоў ішла гаворка пра тое, каб праводзіць у бальніцы святую Імшу, таму што многія пацыенты фізічна не могуць дайсці да касцёла.

Дзякуючы Божай дапамозе і супрацоўніцтву з галоўным ўрачом і іншымі людзьмі, адбылася чаканая Эўхарыстыя, якая з гэтага часу будзе праходзіць кожную сераду а 17-й гадзіне.

Падчас яе кс. Казімір Шыдэлка SDB нагадаў пра важнасць малітвы не толькі за хворых, але і за ўрачоў і медыцынскі персанал, які апякуецца хворымі. Як было адзначана, малітва — вялікая падтрымка і дапамога, а таму, звяртаючыся да галоўнага лекара Езуса Хрыста, трэба памятаць аб тым, што гэта Ён аздараўляе і робіць рукі ўрача спрытнымі і дакладнымі.

У пацыентаў была магчымасць прыступіць да сакрамэнту пакаяння і атрымаць сакрамэнт намашчэння хворых.

Паводле sdb.by, (IL)