7 мая Мітрапаліт Мінска-Магілёўскі арцыбіскуп Тадэвуш Кандрусевіч здзейсніў пастырскую кананічную візітацыю парафіі Найсвяцейшай Панны Марыі Ружанцовай (св. Дамініка) у Ракаве.

Падчас візітацыі іерарх спраўдзіў візітацыйны пратакол, касцёльныя кнігі і паразмаўляў з пробашчам. Потым у парафіяльным доме арцыпастыр сустрэўся з сёстрамі дамініканкамі, якія вядуць у парафіі заняткі па рэлігіі. Мітрапаліт сустрэўся таксама з сям’ёй Андрэя Бурака з Ракава, які сёння вучыцца ў семінарыі, і падзякаваў бацькам за выхаванне сына, які, пачуўшы голас клічучага Пана, пайшоў за ім.

Арцыбіскуп наведаў могілкі і памаліўся за памерлых святароў і вернікаў парафіі.

Пасля ўрачыстага ўваходу ў касцёл Мітрапаліта прывіталі вернікі парафіі і дзеці. Арцыпастыр пагутарыў з дзецьмі, адказаў на іх пытанні (напрыклад, іх цікавіла, як стаць біскупам), а таксама пазнаёміўся з прадстаўнікамі ракаўскай парафіі: найстарэйшымі вернікамі, урачамі, настаўнікамі, міністрантамі, хорам, манахінямі і дабрадзеямі касцёла і інш.

У прывітальным слове Мітрапаліт прыгадаў часы, калі рэлігія была пад забаронай. Нават тады, як адзначыў іерарх, у гэтай мясцовасці былі людзі, якія не здраджвалі Хрысту, баранілі касцёл і перадавалі сваю веру новым пакаленням ракаўчан: «Дзякуючы ім зерне веры было пасеяна ў гэтую зямлю, у душы людзей. Сённяшні Касцёл складаецца не толькі з бабуль, але і з моладзі, якая з'яўляецца, як казаў святы Папа Ян Павел ІІ, надзеяй Касцёла».

У Год Божай Міласэрнасці, падкрэсліў арцыбіскуп Тадэвуш Кандрусевіч, асабліва важна быць удзельнікамі адраджэння Касцёла, каб «падземная рака веры выходзіла на паверхню», трэба несці Евангелле ў гэты свет – і гэта справа не толькі святара, але і кожнага грамадзяніна. Па словах Мітрапаліта, трэба сведчыць Бога ўласным прыкладам, несучы сапраўдны ўзор хрысціянскага жыцця. «Як камяні аддаюць цяпло сонца, так і мы мусім выпраменьваць энергію хрысціянства», – дадаў іерарх. 

Арцыбіскуп прадставіў парафіянам мэты свайго прыезду ў Ракаў і кананічнай візітацыі, якія павінны служыць сумеснаму пошуку шляхоў удасканалення пастырскай дзейнасці. Сэнс візітацыі, па словах Мітрапаліта, не ў тым, каб паглядзець правільна запоўненыя пробашчам кнігі, а каб пабачыць, ці правільна жывуць парафіяне. Па словах іерарха, трэба быць вернікам і па-за парогам касцёла, часам плысці супраць цячэння, быць сапраўднымі хрысціянамі ва ўсім, каб дзякуючы гэтаму мець вечнае шчасце ў небе.

У гаміліі падчас святой Імшы Мітрапаліт засяродзіў увагу на чытаннях з суботы шостага велікоднага тыдня, у якіх Езус кажа: «Я выйшаў ад Айца і прыйшоў у свет. Зноў пакідаю свет і іду да Айца». «Гэтыя словы Евангелля як быццам паўтараюць выраз, што ўсё вяртаецца на сваё месца. Езус выйшаў з дому свайго Нябеснага Айца і вяртаецца да Яго. Яны таксама прадстаўляюць місію Езуса, якая пачынаецца ад Айца і завяршаецца Айцом», – сказаў арцыбіскуп.

Па словах Мітрапаліта, «падчас гэтай місіі Езус абвяшчаў прынцыпы Божага Валадарства, бязмежную Божую міласэрнасць, а сваёй пасхальнай таямніцай смерці і Уваскрасення збавіў чалавецтва». «Гэтым самым Ён стаў пасрэднікам паміж Богам і людзьмі. Ён стаў адным з нас і як дасканалы чалавек Уваскрасеннем яшчэ раз пацвердзіў сваю боскасць. Гэтым самым з аднаго боку Ён стаў аб’яўленнем Бога свету, а з іншага – дасканалым прыкладам для чалавецтва ў імкненні да святасці і да жыццёвай мэты, – дадаў арцыпастыр. – Таму ў перайманні жыцця і прыкладу Езуса мы можам знайсці спаўненне нашага жыцця».

Як нагадаў Мітрапаліт, «Езус таксама кажа, што ўсё, што мы папросім у Нябеснага Айца, нам будзе дадзена». «Гэтым самым Ён падкрэсліў мэту нашага жыцця і ўказаў шлях да Яго. Мэта – гэта вечнае шчасце, аб чым мы павінны найперш прасіць, а шлях – гэта жыццё паводле Божага закону», – адзначыў іерарх.

Арцыбіскуп Тадэвуш Кандрусевіч падзякаваў вернікам за вернасць Хрысту і Касцёлу падчас ганенняў і пажадаў у новых умовах, якія адзначаюцца з аднаго боку свабодай веравызнання, а з іншага – праяўленнямі секулярызму, заўсёды заставацца вернымі свайму хрысціянскаму пакліканню і выбіраць Езуса правадніком як па жыцці, так і на шляху да вечнасці.

Таксама арцыпастыр благаславіў крыжы, якія будуць усталяваны ў адрамантаваным парафіяльным доме.

(DN), (AG), Таццяна Сівец,
фота Таццяны Сівец