8 мая Мітрапаліт Мінска-Магілёскі арцыбіскуп Тадэвуш Кандрусевіч удзяліў сакрамэнт канфірмацыі вернікам парафіі Узвышэння Святога Крыжа ў Вілейцы. А 10-й гадзіне кандыдаты да канфірмацыі, якіх у гэтым годзе было 120 чалавек, сустрэлі і прывіталі свайго арцыпастыра перад уваходам у святыню з хлебам і соллю.

Пасля ўрачыстага ўваходу ў вілейскі касцёл Мітрапаліт Тадэвуш Кандрусевіч прыняў у міністранты 7 хлопцаў, якія далі прысягу пабожна, аддана і з радасцю служыць пры алтары. Новыя міністранты атрымалі з рук іерарха асвечаныя белыя комжы, як напамін аб чысціні душы.

Напачатку святой Імшы пробашч парафіі ксёндз Аляксандр Барыла адзначыў важнасць гэтага дня: «Сёння 120 чалавек прагнуць стаць сведкамі Хрыста і сталымі хрысціянамі, на якіх можа абапірацца Касцёл».

У гаміліі арцыбіскуп Тадэвуш Кандрусевіч звярнуў увагу на першасвятарскую малітву Хрыста і адзначыў важнасць справы еднасці. «Мы, усе хрысціяне, павінны быць моцнымі, павінны быць разам, каб сведчыць аб хрысціянскіх каштоўнасцях і жыць імі. Наша заданне — гэта быць сведкамі Евангелля ў кожных абставінах жыцця, каб Езус быў прысутны ўсюды, дзякуючы нашаму сведчанню», — падкрэсліў іерарх.

Арцыпастыр пажадаў кандыдатам да прыняцця сакрамэнту канфірмацыі адкрыцца на Святога Духа і заставацца вернымі Езусу, Евангеллю і веры продкаў.

Падчас працэсіі з дарамі група тых, хто прыступіў да сакрамэнту канфірмацыі, прынесла да алтара фігуры св. Фаўстыны і св. Яна Паўла ІІ, якія пасля будуць змешчаны ў новапабудаваным бочным алтары вілейскага касцёла ў гонар Божай Міласэрнасці. Алтар плануецца пабудаваць і асвяціць напрыканцы Юбілейнага Года Божай Міласэрнасці. Фігуры святых, чыё жыццё асаблівым чынам было звязана з Божай Міласэрнасцю, асвяціў арцыбіскуп Тадэвуш Кандрусевіч.

Напрыканцы Імшы пробашч парафіі выказаў словы ўдзячнасці арцыпастыру. «Вы для нас вельмі асаблівы чалавек, бо Вы далі пачатак і 25 гадоў таму рэкансэкравалі нашу вілейскую святыню», — адзначыў кс. Аляксандр Барыла. Звяртаючыся да вернікаў, умацаваных дарамі Духа Святога, святар адзначыў: «Мы павінны разам будаваць Божае Валадарства на прыгожай і любімай вілейскай зямлі. Ад нас і нашых паводзінаў залежыць многае. Цяпер Касцёл мае права разлічваць і абапірацца на вас».

Парафіяне, які прынялі сакрамэнт хрысціянскай сталасці, падзякавалі арцыбіскупу Тадэвушу Кандрусевічу за яго ўдзяленне і супольную малітву, а святарам і катэхетам за падрыхтоўку да яго прыняцця.

Пасля Эўхарыстыі парафіяне прынялі крыжы і пасведчанні аб удзяленні сакрамэнту канфірмацыі з рук Мітрапаліта, які пажадаў вернікам заставацца сапраўднымі хрысціянамі.

«Наша зямля мае хрысціянскія карані, але наша хрысціянства не павінна быць толькі традыцыяй, яно павінна жыць і весці нас у новае заўтра», — падкрэсліў іерарх.

Кацярына Дурко,
фота Аксаны Бажко