7 мая, у першую суботу месяца, у межах падрыхтоўкі да святкавання 100-гадовага юбілея аб’яўленняў Маці Божай ў Фаціме, вернікі здзейснілі чарговую пілігрымку ў Нацыянальны санктуарый Маці Божай Будслаўскай. Гэта ўжо шостая аўтобусная пілігрымка з мінскай парафіі Свв. Сымона і Алены.

Яна выпала якраз на месяц, калі асаблівым чынам кожны дзень ушаноўваецца Божая Маці ў маёвых набажэнствах. У Будслаў накіраваліся пілігрымы не толькі з Мінска, але і з іншых гарадоў Беларусі, і католікі, і праваслаўныя.

Вернікі мелі магчымасць прайсці праз Брамы Божай Міласэрнасці, прыступіць да споведзі падчас адарацыі Найсвяцейшага Сакрамэнту. На гэты раз пілігрымам пашчасціла: адарацыя трывала перад святой Імшой больш чым паўгадзіны. Яны спявалі Ларэтанскую літанію да Найсвяцейшай Панны Марыі, а таксама памаліліся Навэнну да Духа Святога, потым кожны асабіста ў цішыні змог прадставіць усемагутнаму Богу праз заступніцтва Божай Маці свае просьбы і падзякаваць за атрыманыя ласкі.

На святой Імшы, якую цэлебраваў айцец Язафат, з Евангелля паводле Яна пілігрымы пачулі вельмі моцныя словы Хрыста, які звяртаецца да сваіх вучняў: «Сапраўды, сапраўды кажу вам: калі чаго ў імя Маё папросіце ў Айца, дасць вам. Дагэтуль вы нічога не прасілі ў імя Маё. Прасіце і атрымаеце, каб радасць вашая была поўнай» (Ян 16, 23-24). Гэтыя словы Езуса вельмі кранулі іх душы і сэрцы.

Маці Божая збірае сваіх дзяцей вакол алтара ў Будслаўскім санктуарыі, каб умацавалася іх вера ў Божую ўсемагутнасць і каб іх сэрцы напоўніліся яшчэ большай бескарыслівай любоўю да бліжніх. Шлях да Езуса праз Марыю — найбольш дасканалы шлях да святасці, менавіта таму многія вернікі скіроўваюцца ў Будслаўскі санктуарый.

Каяцца клікала Божая Маці нас,
Цуды ствараючы ў Фаціме,
Каб мы не згінулі пад пакараннямі,
Раіла шчырае каянне.

Прыпеў: Табе верым мы, Маці з Фацімы
Табе верым мы, Маці з Фацімы.

Прыпеў: Табе верым мы, Маці з Фацімы
Табе верым мы, Маці з Фацімы.

«За пяць суботаў, што Мне ахвяруеце ,
Сэрца Маё пашкадуеце —
У непазбежны і страшны смяротны час
Я з ласкай Божай прыйду да вас».

Прыпеў: Табе верым мы, Маці з Фацімы
Табе верым мы, Маці з Фацімы.

Песня «Маці з Фацімы» на словы Галіны Смоляк прагучала пасля святой Імшы, таксама ў  малітве фацімскага Ружанца вернікі перапрашалі за знявагі і блюзнерствы, накіраваныя супраць ушанавання Божай Маці.

А 15-й гадзіне, як звычайна, у час Божай Міласэрнасці перад Найсвяцейшым Сакрамэнтам вернікі супольна памаліліся Вяночак да Божай Міласэрнасці, перапрашаючы «за грахі нашы і ўсяго свету»

Напрыканцы пілігрымы мелі магчымасць асвяціць ваду і набытыя сувеніры. Жадаючыя зрабілі памятны супольны фотаздымак.

Анастасія-Алена Блусянкова,
фота аўтара

Чарговая пілігрымка ў Будслаўскі санктуарый адбудзецца ў першую суботу месяца — 4 чэрвеня. Ад’езд аўтобусам з Мінска ў 9 гадзін ад касцёла свв. Сымона  і Алены.

Запіс у пілігрымку ў сакрыстыі касцёла ці па тэлефонах:
+ 375 (29) 246 62 97 ці  + 375(25) 618 17 50 Уладзімір Вайцяховіч
+ 375 (29) 557 08 27 Анастасія-Алена Блусянкова
+ 375 (33) 337 44 95 (мтс) Ірына Жук